കണ്ണൂർ: കണ്ണൂരിൽ ബോംബ് നിര്മാണത്തിനിടയില് സ്ഫോടനം. പാനൂർ മുളിയാത്തോട്ടിലാണ് സ്ഫോടനം നടന്നത്. അപകടത്തിൽ ഒരാൾ മരിച്ചു. സിപിഎം പ്രവര്ത്തകൻ പാനൂര് കൈവേലിക്കൽ സ്വദേശി ഷെറിൻ ആണ് മരിച്ചത്. ഒരാൾ പരിക്കുകളുമായി ചികിത്സയിലാണ്. പുലർച്ചെ ഒരു മണിയോടെയാണ് സ്ഫോടനം ഉണ്ടായത്.
ബോംബ് നിര്മ്മാണത്തിനിടെയാണ് സ്ഫോടനം നടന്നത് എന്നാണ് സംശയം. പാനൂരിൽ നിര്മ്മാണത്തിലിരിക്കുന്ന വീടിന്റെ ടെറസിൽ വച്ചാണ് ബോംബ് നിർമിച്ചുകൊണ്ടിരുന്നത്. സ്ഫോടനത്തിൽ ഇരുവർക്കും ഗുരുതരമായി പരിക്കേറ്റിരുന്നു. ചികിത്സയിൽ തുടരുന്നതിനിടെയാണ് ഷെറിൻ മരണപ്പെട്ടത്. ഷെറിന് സ്ഫോടനത്തിൽ കൈക്കും മുഖത്തും ദേഹത്തും ഗുരുതരമായി പരിക്കേറ്റിരുന്നു. കൈപ്പത്തികൾ അറ്റുപോയ നിലയിലായിരുന്നു. അപകടത്തിൽ പരിക്കേറ്റ വിനീഷിന്റെ നില ഗുരുതരമായി തുടരുകയാണ്. രണ്ടു പേരും സി പി എം പ്രവർത്തകരാണ്.
