ഡൽഹി: ഒടുവിൽ മണിപ്പൂർ കലാപത്തിൽ പ്രതികരണവുമായി പ്രധാനമന്ത്രി നരേന്ദ്ര മോദി രംഗത്ത്. ലോക്‌സഭാ ഇലക്ഷൻ അടുത്തിരിക്കുന്ന വേളയിലാണ് പ്രധാനമന്ത്രിയുടെ പ്രതികരണം. മണിപ്പൂർ കലാപത്തിൽ സാധ്യമായതെല്ലാം ചെയ്തുവെന്നാണ് മോദി പറയുന്നത്.
സർക്കാർ ഇടപെട്ടതോടെ സ്ഥിതിഗതികൾ മെച്ചപ്പെട്ടുവെന്നും സംസ്ഥാന സർക്കാർ ആവശ്യപ്പെട്ട എല്ലാ പിന്തുണയും കേന്ദ്ര സർക്കാർ നൽകിയെന്നും അദ്ദേഹം വ്യക്തമാക്കി. കൂടാതെ ആഭ്യന്തര മന്ത്രി അമിത് ഷാ അവിടെ താമസിച്ചുകൊണ്ട് സ്ഥിതിഗതികൾ വിലയിരുത്തിയെന്നും വിവിധ തലത്തിലുള്ള വ്യക്തികളുമായി അദ്ദേഹം നിരന്തരം യോഗങ്ങൾ സംഘടിപ്പിച്ചുവെന്നും മോദി കൂട്ടിച്ചേർത്തു.
ഇതിനുപുറമെ കലാപ ബാധിതർക്കുള്ള സഹായവും പുനരധിവാസ പ്രവർത്തനങ്ങളും ഇപ്പോഴും മണിപ്പൂരിൽ തുടരുന്നുണ്ടെന്നും മോദി പറഞ്ഞു. അസം ട്രിബ്യൂണ്‍ എന്ന ഇംഗ്ലീഷ് ദിനപത്രത്തിന് നല്‍കിയ അഭിമുഖത്തിലായിരുന്നു പ്രധാനമന്ത്രിയുടെ പ്രതികരണം.
