കൊച്ചി: ഏറെ കാത്തിരുന്ന ഫോർട്ട് കൊച്ചിയിലേക്കുള്ള കൊച്ചി വാട്ടർ മെട്രോ സർവ്വീസ് ആരംഭിച്ചു. സർവീസ് ആരംഭിച്ചത് മുതൽ നല്ല പ്രതികരണങ്ങളാണ് ലഭിക്കുന്നത്. കൊച്ചി നഗരത്തിലെ ഗതാഗത കുരുക്കിൽ അകപ്പെടാതെ പെട്ടെന്ന് എത്തിച്ചേരാം എന്നുള്ളതിനാൽ ഏറെ സ്വീകാര്യതയാണ് വാട്ടർ മെട്രോയ്ക്ക് ലഭിക്കുന്നത്. ഹൈക്കോർട്ട് ജംഗ്ഷൻ ടെർമിനലിൽ നിന്ന് ഫോർട്ട് കൊച്ചിയിലേക്ക് 40 രൂപയാണ് ടിക്കറ്റ് നിരക്ക്. 20 മുതൽ 30 മിനിറ്റ് ഇടവേളകളിൽ ഹൈക്കോർട്ട് ജംഗ്ഷൻ – ഫോർട്ട് കൊച്ചി റൂട്ടിൽ സർവ്വീസ് ഉണ്ടാകും.
കൊച്ചിൻ ഷിപ്പ് യാർഡിൽ നിന്ന് വാങ്ങിയ പതിനാലാമത് ബോട്ടിന്റെയും ടിക്കറ്റിംഗ് ഉൾപ്പെടെയുള്ള സംവിധാനങ്ങളുടെയും ട്രയൽ റൺ പൂർത്തിയായതോടെയാണ് ഫോർട്ട് കൊച്ചി ടെർമിനലിൽ നിന്ന് കഴിഞ്ഞ ദിവസം സർവ്വീസ് ആരംഭിച്ചത്. കഴിഞ്ഞ വർഷം ഏപ്രിൽ 25ന് നാണ് കൊച്ചി വാട്ടർ മെട്രോ സർവ്വീസ് ആരംഭിക്കുന്നത്.
