തിരുവനന്തപുരം: അച്ചടക്ക നടപടിക്ക് വിധേയനായ മുൻ കെപിസിസി സെക്രട്ടറി എം.എ ലത്തീഫിനെ കേരള പ്രദേശ് കോൺഗ്രസ് കമ്മിറ്റി തിരിച്ചെടുക്കാൻ തീരുമാനിച്ചു. 2021 ലാണ് അദ്ദേഹം അച്ചടക്ക നടപടി നേരിട്ടത്.
കഴിഞ്ഞ രണ്ടു വർഷക്കാലത്തിലേറെയായി നടപടി വന്നുവെങ്കിലും അടിയുറച്ച കോൺഗ്രസുകാരൻ ആയതുകൊണ്ട് മാത്രം മറ്റൊരിടത്തും ചേക്കേറാൻ പോകാതെ ഇന്ത്യൻ നാഷണൽ കോൺഗ്രസിൽ തന്നെ സാധാ പ്രവർത്തകനായി തുടരണമെന്ന് ആഗ്രഹമുള്ളതുകൊണ്ടാണ് ഇത്രയും കാലം നീണ്ടുപോയിട്ടും മറ്റൊരു വഴിയിലേക്കും പോകാതിരുന്നതെന്ന് എം എ ലത്തീഫ് പറഞ്ഞു. നടപടി പിൻവലിച്ച കെപിസിസി, എഐസിസി നേതൃത്വത്തിന് എല്ലാവിധ നന്ദി അറിയിക്കുന്നുവെന്ന് എം എ ലത്തീഫ് കൂട്ടിച്ചേർത്തു. മുൻ മുഖ്യമന്ത്രി ഉമ്മൻചാണ്ടിക്ക് സംസാരശേഷി നഷ്ടപ്പെട്ടപ്പോഴും അവസാനം തന്റെ പേര് എഴുതി കാണിച്ച് തന്നെ തിരിച്ചെടുക്കണമെന്ന് ആവശ്യപ്പെട്ടിട്ടുണ്ടെന്നും അദ്ദേഹം വ്യക്തമാക്കി.
