കഴക്കൂട്ടം: കഴക്കൂട്ടത്ത് ഉത്സവം കാണാനെത്തിയവരുടെ കാർ കത്തിച്ചതായി പരാതി. കഴക്കൂട്ടം മഹാദേവർ ക്ഷേത്രത്തിൽ വന്നവരുടെ കാറാണ് അഗ്നിക്കിരയാക്കിയതെന്നാണ് പരാതിയിൽ പറയുന്നത്. ഇന്ന് പുലർച്ചെയാണ് സംഭവം നടന്നത്.
ഇന്നലെ കാറിൽ സഞ്ചരിച്ചവരും പ്രദേശവാസികളും തമ്മിൽ തർക്കം നടന്നിരുന്നു. ഉത്സവത്തിരക്കിനിടെ ഇവർ അപകടകരമായിട്ടാണ് കാറോടിച്ചതെന്നാണ് പ്രദേശവാസികൾ പറയുന്നത്. ഇക്കാരണങ്ങൾ പറഞ്ഞ് രണ്ടു കൂട്ടരും തമ്മിൽ തർക്കം നടന്നിരുന്നു. തുടർന്ന് പോലീസ് സ്ഥലത്തെത്തിയാണ് പ്രശ്നം പരിഹരിച്ചത്.
അതിനു ശേഷം കാർ അമ്പലത്തിനു സമീപമായി പാർക്ക് ചെയ്തിരുന്നുവെന്നും ഇന്ന് രാവിലെ നോക്കിയപ്പോഴാണ് വാഹനം കത്തിയ നിലയിൽ കണ്ടെത്തിയതെന്നും പരാതിയിൽ പറയുന്നു. സംഭവത്തിൽ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
