കൊച്ചി: പന്തീരാങ്കാവ് ഗാർഹിക പീഡനക്കേസിൽ വമ്പൻ ട്വിസ്റ്റുകളാണ് പുറത്തുവരുന്നത്. കഴിഞ്ഞ ദിവസം യുവതി മൊഴി മാറ്റി പറഞ്ഞിരുന്നു. കേസിൽ പ്രതിയായ രാഹുൽ നിരപരാധിയാണെന്നാണ് യുവതിയുടെ പുതിയ പ്രതികരണം. ഇതിനു പിന്നാലെ പ്രതികരണവുമായി രംഗത്തെത്തിയിരിക്കുകയാണ് യുവതിയുടെ പിതാവ്.
മകളെ അവർ സമ്മർദം ചെലുത്തി പറയിപ്പിച്ചു എന്നാണ് മനസ്സിലാക്കുന്നതെന്നാണ് യുവതിയുടെ അച്ഛൻ പറയുന്നത്. മകളുടെ ശരീരത്തിലെ മുറിപ്പാടുകൾ കണ്ടിട്ടാണ് പരാതി നൽകിയത്. അതെ സമയം മകളെ കാണാനില്ലെന്ന് അറിഞ്ഞത് ഇന്നലെയാണെന്ന് അച്ഛൻ പറഞ്ഞു. കഴിഞ്ഞ രണ്ടു ദിവസമായി മകളുടെ ഫോൺ സ്വിച്ച് ഓഫ് ആയിരുന്നു. ശനിയാഴ്ച വരെ മകളോട് ഫോണിൽ സംസാരിച്ചിരുന്നു. തുടർന്ന് വിളിച്ചിട്ട് കിട്ടാതായതോടെ ഓഫീസുമായി ബന്ധപ്പെട്ടിരുന്നു. എന്നാൽ അവിടെ ചെന്നിട്ടില്ലായിരുന്നു എന്നാണ് അറിയാൻ കഴിഞ്ഞതെന്നും പിതാവ് പറഞ്ഞു.
മകൾ അവരുടെ കസ്റ്റഡിയിലാണെന്നും പെൺകുട്ടിയുടെ മൊഴിമാറ്റത്തിൽ അന്വേഷണം വേണമെന്നും കുടുംബം ആവശ്യപ്പെട്ടു. അതേസമയം കേസ് ഒത്തുതീർപ്പാക്കാനുള്ള നടപടികൾ തുടങ്ങിയതായി പ്രതിഭാഗം അഭിഭാഷകൻ പ്രതികരിച്ചു.
