കൊല്ലം: അമിതമായി പൊറാട്ട കഴിച്ച് പശുക്കൾ ചത്തു. കൊല്ലം വെളിനല്ലൂരിലാണ് സംഭവം. അഞ്ചുപശുക്കളാണ് തീറ്റയിൽ പൊറോട്ട അമിതമായി നൽകിയതിനെ തുടർന്ന് ചത്തത്. പൊറോട്ടയും ചക്കയും അമിതമായി പശുക്കൾക്ക് നൽകിയിരുന്നു.
വെളിനല്ലൂർ വട്ടപ്പാറ ഹസ്ബുള്ളയുടെ ഫാമിലാണ് സംഭവം നടന്നത്. ഒൻപത് പശുക്കൾ അവശനിലയിലാണ്. ഇന്നലെ വൈകിട്ട് മുതലാണ് പശുക്കൾ കുഴഞ്ഞുവീഴാൻ ആരംഭിച്ചത്. ജില്ലാ വെറ്ററിനറി കേന്ദ്രത്തിൽ നിന്നുള്ള എമർജൻസി റസ്പോൺസ് ടീമെത്തി അവശനിലയിലായ കന്നുകാലികൾക്ക് ചികിത്സ നൽകി.
അതെ സമയം വെളിനല്ലൂർ വട്ടപ്പാറ ഹസ്ബുള്ളയുടെ ഫാം മന്ത്രി ജെ ചിഞ്ചു റാണി സന്ദർശിച്ചു. ആകസ്മികമായ ഇത്തരം അപകടങ്ങൾ കർഷകർക്ക് വലിയ സാമ്പത്തിക നഷ്ടമാണ് വരുത്തി വെയ്ക്കുന്നതെന്ന് മന്ത്രി പറഞ്ഞു.പശുക്കളുടെ തീറ്റയെക്കുറിയുള്ള അവബോധത്തിന്
ഇനിയും പ്രചരണം നൽകേണ്ടതുണ്ടെന്നും പോസ്റ്റ്മോർട്ടം റിപ്പോർട്ട് തയ്യാറായാൽ നഷ്ടപരിഹാരത്തിലുള്ള നടപടി സ്വീകരിക്കുമെന്നും മന്ത്രി അറിയിച്ചു.
