കഴക്കൂട്ടം: ചെമ്പഴന്തി അഗ്രികൾച്ചറൽ ഇംപ്രൂവ്മെന്റ് സഹകരണ സംഘത്തിലെ തട്ടിപ്പിൽ പ്രതികരണവുമായി സിപിഐഎം കഴക്കൂട്ടം ഏരിയ കമ്മിറ്റി. കോൺഗ്രസ് നിയന്ത്രണത്തിലുള്ള ചെമ്പഴന്തി അഗ്രികൾച്ചറൽ ഇംപ്രൂവ്മെന്റ് സഹകരണ സംഘത്തിൽ നിന്നും ചിട്ടി തുക നൽകാത്തതിൽ അണിയൂർ സ്വദേശി ബിജു കുമാർ ആത്മഹത്യ ചെയ്തിരുന്നു. സംഭവത്തിൽ സമാഗ്ര അന്വേഷണം നടത്തണമെന്ന് സി പി ഐ എം ആവശ്യപ്പെട്ടു. കൂടാതെ അന്വേഷണം നടത്തി പ്രതികളെ നിയമത്തിനു മുന്നിൽ കൊണ്ടുവരണമെന്നും സമഗ്രമായ അന്വേഷണം നടത്തി കുറ്റക്കാർക്കെതിരെ കർശന നടപടി സ്വീകരിക്കണമെന്നും സിപിഐഎം ഏരിയ സെക്രട്ടറി ഡി രമേശൻ പറഞ്ഞു.
സംഘം കോടിക്കണക്കിനു രൂപ നിക്ഷേപകരിൽ നിന്ന് സമാഹരിക്കുകയും വഴിവിട്ട രീതിയിൽ റിയൽ എസ്റ്റേറ്റ് തുടങ്ങിയ മേഖലകളിൽ വിനിയോഗിക്കുകയും ചെയ്തതായി റിപ്പോർട്ടുകൾ പരാമർശിക്കുന്നുണ്ട്. മാത്രമല്ല സ്വജനപക്ഷപാതവും കെടുകാര്യസ്ഥതയും അഴിമതിയും ചേർന്നപ്പോൾ ബാങ്ക് വലിയ സാമ്പത്തിക പ്രതിസന്ധിയിലായി എന്നാണ് മനസ്സിലാക്കുന്നതെന്നും അദ്ദേഹം കൂട്ടിച്ചേർത്തു.
