തിരുവനന്തപുരം : പാരിസ് ഒളിമ്പിക്സില് ലോകത്തെ സൂപ്പര് താരങ്ങള് പിറന്നപ്പോള് തലസ്ഥാനത്തും പിറന്നു കുരുന്ന് താരങ്ങള്. ഒളിമ്പിക്സ് മാതൃകയില് വേദിയൊരുക്കി ലുലു മാള് സംഘടിപ്പിച്ച ലുലു ലിറ്റില് ഗെയിംസിലാണ് ഈ കൗതുക കാഴ്ച. ഓട്ടവും ചാട്ടവും ഫുട്ബോളും എല്ലാമായി ആറ് മാസം മുതല് മൂന്ന് വയസ്സ് വരെ പ്രായമുള്ള കുരുന്നുകളാണ് ലിറ്റില് ഗെയിംസില് അണിനിരന്നത്.
ബേബി ക്രോള് റെയ്സ്, ഹര്ഡില് റെയ്സ്, വെയ്റ്റ്ലിഫിറ്റിംഗ്, സൈക്കിൾ റെയ്സ് അടക്കമുള്ള ഇനങ്ങളും മത്സരങ്ങളില് ഉള്പ്പെടുത്തിയിരുന്നു. നൂറിലധികം പേരാണ് അണിനിരന്നത്. മക്കളെ പ്രോത്സാഹിപ്പിയ്ക്കാന് രക്ഷിതാക്കളും മുന്നിട്ടിറങ്ങിയതോടെ ആവേശം ഇരട്ടിയായി. കുഞ്ഞു ലോകത്തെ ഒളിമ്പിക്സ് കാഴ്ചകള് കാണാന് നിരവധി പേരാണ് മാളിലെ ഗ്രാന്ഡ് എട്രിയത്തില് തടിച്ചുകൂടിയത്. മത്സരങ്ങളില് പങ്കെടുത്ത എല്ലാവര്ക്കും സമ്മാനങ്ങള് നല്കി.
