തിരുവനന്തപുരം: തിരുവനന്തപുരം പോത്തൻകോട് നവജാത ശിശുവിന്റെ മൃതദേഹം കുഴിച്ചിട്ട നിലയിൽ കണ്ടെത്തി. പോത്തൻകോട് വാവറ അമ്പലത്താണ് സംഭവം. നേപ്പാൾ സ്വദേശിനി അമൃതയാണ് കുട്ടിയെ കുഴിച്ചിട്ടത്.
പൂർണ്ണ വളർച്ചയെത്താത്ത കുഞ്ഞിനെയാണ് പ്രസവിച്ചശേഷം ഇവർ കുഴിച്ചിട്ടത്. വാവറ അമ്പലത്ത് കന്നുകാലികൾക്കായി വളർത്തുന്ന തീറ്റപ്പുൽ കൃഷിയിടത്തിൽ നിന്നാണ് കുഞ്ഞിന്റെ മൃതദേഹം കണ്ടെത്തിയത്.
ഇന്നലെ രാത്രി എട്ടുമണിക്കാണ് പ്രസവിച്ചതെന്നാണ് യുവതിയുടെ മൊഴി. തുടർന്ന് യുവതിക്ക് അമിത രക്തസ്രാവം അനുഭവപ്പെടുകയായിരുന്നു. ഇതേ തുടർന്നാണ് യുവതി തിരുവനന്തപുരം എസ് എ ടി ആശുപത്രിയിൽ ചികിത്സ തേടിയത്. അവിടെ വച്ചാണ് യുവതി കുഞ്ഞിനെ കുഴിച്ചിട്ട കാര്യം ഡോക്ടർമാരെ അറിയിച്ചത്.
എസ് എ ടി ആശുപത്രിയിലെ ഡോക്ടർമാരാണ് പോത്തൻകോട് പൊലീസിൽ വിവരമറിയിച്ചത്.തുടർന്ന് നടത്തിയ പരിശോധനയിലാണ് കുഞ്ഞിന്റെ മൃതദേഹം കണ്ടെത്തിയത്. പോത്തൻകോട് പൊലീസ് കേസ് രജിസ്റ്റർ ചെയ്തു.
