പത്തനംതിട്ട: വൈദികൻ എന്ന വ്യാജേന വീട്ടിൽ കയറി മാല മോഷ്ടിച്ച പ്രതി പിടിയിൽ. തിരുവനന്തപുരം കാഞ്ഞിരംകുളം സ്വദേശി ഷിബു എസ് ആണ് പിടിയിലായത്. പത്തനംതിട്ട ഏനാദിമംഗലത്താണ് സംഭവം നടന്നത്.
ഇയാൾ വൈദിക വേഷം ധരിച്ച് വീട്ടിൽ കയറി പ്രാർഥിച്ച ശേഷമാണ് മോഷണം നടത്തിയത്. കഴിഞ്ഞ ദിവസമായിരുന്നു സംഭവം നടന്നത്. ഇയാള് സ്ഥിരം കുറ്റവാളിയാണെന്നാണ് പൊലീസ് പറയുന്നത്. ഏനാദിമംഗലം തോട്ടപ്പാലം സ്വദേശികളായ ബേബി – മറിയാമ്മ ദമ്പതികളാണ് മോഷണത്തിനിരയായത്.
കഴിഞ്ഞ മാസം 30 നായിരുന്നു ഇയാൾ ജയിൽ മോചിതനായത്. തൊട്ട് പിന്നാലെയാണ് വീണ്ടും പിടിയിലായത്. വൈദികൻ എന്ന് പരിചയപ്പെടുത്തിയാണ് ഇയാൾ വീട്ടിലെത്തിയത്. തുടർന്ന് സഭയുമായി ബന്ധപ്പെട്ട ഒരു ധനസഹായം കുടുംബത്തിന് അനുവദിച്ചിട്ടുണ്ടെന്നും അത് ലഭ്യമാകാൻ ആയിരം രൂപ നൽകണമെന്നും അറിയിച്ചു. അതിനു ശേഷം പണവും വാങ്ങി വീടിനുള്ളിൽ കയറി പ്രാർഥിക്കുകയായിരുന്നു.
അതിനു പിന്നാലെ ഇയാൾ മറിയാമ്മയുടെ കഴുത്തിൽ കിടന്ന മാലയും പൊട്ടിച്ചോടുകയായിരുന്നു. ഒരു പവൻ്റെ മാലയാണ് ഇയാൾ കവർന്നത്. തുടർന്ന് പോലീസ് പിടികൂടി ഇയാളെ സ്റ്റേഷനിൽ എത്തിച്ചപ്പോഴും സ്റ്റേഷനില് ഉദ്യോഗസ്ഥരെ ആക്രമിക്കാന് ശ്രമിച്ചുവെന്നും പോലീസ് പറഞ്ഞു.
