പാലക്കാട്: തെരഞ്ഞെടുപ്പ് പ്രചാരണത്തിനൊടുവില് പാലക്കാട്ട് പോളിങ് തുടങ്ങി. വോട്ടെടുപ്പിന്റെ ആദ്യ രണ്ടു മണിക്കൂറുകള് മികച്ച പോളിംഗാണ് രേഖപ്പെടുത്തിയത്. എന്നാൽ നിലവിൽ മന്ദ ഗതിയിലാണ് പോളിംഗ് നടക്കുന്നത്.27.03 % പേരാണ് നിലവിൽ വോട്ട് രേഖപ്പെടുത്തിയത്.
രാവിലെ ഏഴു മണി മുതലാണ് പോളിംഗ് ആരംഭിച്ചത്. അന്തിമ വോട്ടര് പട്ടിക പ്രകാരം ആകെ 1,94,706 വോട്ടര്മാരാണ് ഇത്തവണ വോട്ടു രേഖപ്പെടുത്തുന്നത്. ഇതില് 1,00,290 പേര് സ്ത്രീ വോട്ടര്മാരാണ്. 2306 പേര് 85 വയസ്സിനു മുകളില് പ്രായമുള്ളവരും 780 പേര് ഭിന്നശേഷിക്കാരും നാലു പേര് ട്രാന്സ്ജെന്ഡേഴ്സുമാണ്. 2445 കന്നിവോട്ടര്മാരും 229 പേര് പ്രവാസി വോട്ടര്മാരുമാണ്.
വൈകീട്ട് ആറു മണി വരെയാണ് വോട്ടെടുപ്പ്. പുലര്ച്ചെ 5.30 ന് മോക് പോള് ആരംഭിച്ചിരുന്നു. നാല് ഓക്സിലറി ബുത്തുകള് ഉള്പ്പെടെ ആകെ 184 പോളിങ് സ്റ്റേഷനുകളാണ് ഉള്ളത്. ആകെ 736 പോളിങ് ഓഫീസര്മാരെയാണ് ഇവിടേക്ക് നിയമിച്ചിരിക്കുന്നത്. എല്ലാ ബൂത്തുകളിലും റാംപ്, ശുചിമുറി, കുടിവെള്ള സൗകര്യങ്ങള് ഒരുക്കിയിട്ടുണ്ട്. വനിതാ ഓഫീസര്മാരുടെ മേല്നോട്ടത്തില് ഒരു പോളിങ് സ്റ്റേഷനും ഒമ്പത് മാതൃകാ പോളിങ് ബൂത്തുകളും മണ്ഡലത്തില് ഉണ്ട്. എല്ലാ പോളിങ് സ്റ്റേഷനുകളിലും വോട്ടെടുപ്പ് നടപടികള് വെബ്കാസ്റ്റിങ് നടത്തുന്നുണ്ട്.
മണ്ഡലത്തില് മൂന്ന് ഇടങ്ങളിലായി ആകെ ഏഴു വോട്ടെടുപ്പ് കേന്ദ്രങ്ങളെയാണ് പ്രശ്നബാധിത ബൂത്തുകളായി കണ്ടെത്തിയിട്ടുള്ളത്. 58 എണ്ണം പ്രശ്ന സാധ്യതാ പട്ടികയിലുണ്ട്. ഇത്തരം ബൂത്തുകളില് കേന്ദ്ര സുരക്ഷാ സേന (സി.എ.പി.എഫ്) യുടെയും പൊലീസിന്റെ നേതൃത്വത്തില് അധിക സുരക്ഷയൊരുക്കും.
പോളിങ് സ്റ്റേഷനുകളിലേക്കായി റിസര്വ് അടക്കം 220 വീതം ബാലറ്റ്, കണ്ട്രോള് യൂണിറ്റുകളും 239 വി.വി.പാറ്റ് യൂണിറ്റുകളുമാണ് തയ്യാറാക്കിയിരിക്കുന്നത്. ബാലറ്റ്, കണ്ട്രോള് യൂണിറ്റുകള് 20 ശതമാനവും വിവിപാറ്റ് യൂണിറ്റുകള് 30 ശതമാനവുമാണ് അധികമായി തയ്യാറാക്കി വെച്ചിരിക്കുന്നത്.
