കൊച്ചി: നടനും എം എൽ എയുമായ മുകേഷ് ഉൾപ്പടെയുള്ള സിനിമാപ്രവർത്തകർക്കെതിരെ നൽകിയ പീഡന പരാതി പിൻവലിക്കുന്നുവെന്ന് നടി. കേസ് പിൻവലിക്കാനുള്ള നടപടികൾ ഉടൻ ആരംഭിക്കുമെന്നും ആലുവ സ്വദേശിയായ നടി അറിയിച്ചു.
മുകേഷ് ഉൾപ്പടെ ഏഴു പേർക്കെതിരെയാണ് നടി പരാതി നൽകിയിരുന്നത്. ഈ പരാതികളാണ് ഇപ്പോൾ പിൻവലിക്കാനൊരുങ്ങുന്നത്. പ്രത്യേക അന്വേഷണ സംഘത്തിന്റെ അന്വേഷണം പുരോഗമിക്കുന്നതിനിടെയാണ് പരാതി നടി പിൻവലിക്കുന്നത്. തനിക്ക് സർക്കാരിൽ നിന്നും പിന്തുണ കിട്ടിയില്ലെന്നാണ് നടി പറയുന്നത്.
മാത്രമല്ല തനിക്കെതിരെ ചുമത്തിയ വ്യാജ പോക്സോ കേസിന്റെ സത്യാവസ്ഥ തെളിയിക്കാൻ സർക്കാർ തയാറാവത്തതിനാലുമാണ് കേസ് പിൻവലിക്കാൻ തീരുമാനിച്ചതെന്ന് നടി വ്യക്തമാക്കി. കേസുകൾ പിൻവലിക്കണമെന്ന് ആവശ്യപ്പെട്ട് പ്രത്യേക അന്വേഷണ സംഘത്തിന് നടി ഉടൻ ഇമെയിൽ അയക്കും.
