തിരുവനന്തപുരം: തിരുവനന്തപുരം കഴക്കൂട്ടത്ത് ഹോട്ടൽ ജീവനക്കാരന് വെട്ടേറ്റു. ഗുണ്ടാ സംഘമാണ് ജീവനക്കാരനെ വെട്ടിപ്പരിക്കേൽപ്പിച്ചത്. കഴക്കൂട്ടം ജംഗ്ഷനിലെ കൽപ്പാത്തി ഹോട്ടലിലായിരുന്നു ആക്രമണം നടന്നത്. ഹോട്ടൽ ജീവനക്കാരനായ വെഞ്ഞാറമൂട് സ്വദേശി തൗഫീഖ് റഹ്മാന് (23) കൈയ്ക്കാണ് വെട്ടേറ്റത്.
ഇന്നലെ രാത്രി പതിനൊന്നരയോടെയാണ് സംഭവം നടന്നത്. സംഭവത്തിൽ പ്രതികളെ പോലീസ് പിടികൂടി. അക്രമം നടത്തിയ ശേഷം പ്രതികൾ രക്ഷപ്പെട്ടിരുന്നു. എന്നാൽ പോലീസിന്റെ ഊർജിതമായ അന്വേഷണത്തിൽ ഉടൻ തന്നെ പ്രതികളെ പിടികൂടി.നിരവധി കേസുകളിൽ പ്രതിയായ കഴക്കൂട്ടം സ്വദേശി വിജീഷ്, സഹോദരനായ വിനീഷ് എന്നിവരാണ് ആക്രമണം നടത്തിയത്. ഇവർ വധശ്രമമടക്കമുള്ള നിരവധി കേസുകളിൽ പ്രതികളാണ്.
മുൻവൈരാഗ്യമാണ് ആക്രമണത്തിൽ കലാശിച്ചതെന്നാണ് റിപ്പോർട്ട്. ഒരാഴ്ച മുൻപ് വിനീഷ് മദ്യപിച്ച് ഹോട്ടലിലെത്തി പണം ആവശ്യപ്പെട്ട് തർക്കമുണ്ടായിരുന്നു. ഈ വിരോധമാണ് ആക്രമണത്തിലേക്ക് നയിച്ചത്. വെട്ടുകത്തി കൊണ്ട് കഴുത്തിൽ വെട്ടാനാണ് ഇവർ ശ്രമിച്ചത്. ഇത് തടഞ്ഞ തൗഫീഖിന്റെ കൈയിൽ വെട്ടേൽക്കുകയായിരുന്നു. കൈപ്പത്തിയിൽ ഗുരുതരമായി പരിക്കേറ്റ തൗഫീഖ് മെഡിക്കൽ കോളേജിൽ ചികിത്സയിലാണ്.
