തിരുവനന്തപുരം: സംസ്ഥാനത്തു വൻകിട മദ്യനിർമ്മാണശാലക്ക് അനുമതികൊടുക്കുക വഴി ജലദൗർലഭ്യത്തിനും കൃഷിനഷ്ടത്തിനും ഇടയാക്കുമെന്നും അതിലുപരി മദ്യനയം പ്രോത്സാഹിപ്പിക്കപ്പെടുമെന്നുള്ള ആശങ്ക അകറ്റാൻ സർക്കാർ തീരുമാനം പുനഃപരിശോധിക്കണമെന്ന് ഐ എൻ എൽ സംസ്ഥാന സെക്രട്ടറി അഡ്വ. ജെ. തംറൂഖ് പ്രസ്താവനയിൽ ആവശ്യപ്പെട്ടു. യു ഡി എഫ് സർക്കാരിന്റെ കാലത്ത് ഘട്ടം ഘട്ടമായി മദ്യം നിരോധിക്കുമെന്നാണ് അവകാശപ്പെട്ടത്. എന്നാൽ എൽ ഡി എഫ് സർക്കാർ ബോധവൽക്കരണത്തിലൂടെ മദ്യത്തിന്റെ ഉപയോഗം കുറച്ചുകൊണ്ടുവരാൻ നടപടികൾ സ്വീകരിക്കുമെന്നാണ് പറഞ്ഞത്.
നിലവിലെ ലിബറലായ മദ്യനയം കാരണം സമൂഹവും കുടുംബങ്ങളും ദുരിതമനുഭവിക്കുകയാണെന്നും അദ്ദേഹം പ്രസ്താവനയിൽ ചൂണ്ടിക്കാട്ടി. ജനക്ഷേമംമുഖമുദ്രയാക്കിയിട്ടുള്ള എൽ ഡി എഫ് സർക്കാർ ജനങ്ങൾക്ക് ഉപകാരമില്ലാത്ത ഈ തീരുമാനം പിൻവലിക്കാനുള്ള വിവേകം കാട്ടണമെന്നും അദ്ദേഹം ആവശ്യപ്പെട്ടു.
