തിരുവനന്തപുരം: തൈക്കാട് ഗവൺമെന്റ് മോഡൽ എച്ച്.എസ്.എൽ.പി. സ്കൂളിലെ പ്രശ്നത്തിന് പരിഹാരം കാണാമെന്ന് ഉറപ്പ് നൽകി മന്ത്രി അപ്പൂപ്പൻ. തൈക്കാട് ഗവൺമെന്റ് മോഡൽ എച്ച്.എസ്.എൽ.പി. സ്കൂളിലെ തോട്ടത്തിൽ നിന്ന് പച്ചക്കറി മോഷണം സംഭവത്തിലാണ് വിദ്യാഭ്യാസ മന്ത്രി വി. ശിവന്‍കുട്ടി ഇടപ്പെട്ടത്.
സ്കൂളിലെ കുട്ടികൾ ഉച്ചഭക്ഷണത്തിനായി കൃഷി ചെയ്ത പച്ചക്കറികളാണ് മോഷണം പോയത്. 30 ഓളം കോളിഫ്ലവറുകളും വഴുതനങ്ങയും തക്കാളിയുമാണ് മോഷണം പോയത്. ഈ പ്രശ്നത്തിന് പരിഹാരം കാണണമെന്നും കള്ളനെ പിടികൂടണമെന്നും ആവശ്യപ്പെട്ട് സ്കൂളിലെ കുട്ടികൾ മന്ത്രിക്ക് കത്തെഴുതിയിരുന്നു.
ഈ കത്തിനാണ് മന്ത്രി മറുപടി നൽകിയിരിക്കുന്നത്. സ്കൂളിലെ തോട്ടത്തിൽ നിന്ന് പച്ചക്കറി മോഷണം പോയതായുള്ള കുഞ്ഞുങ്ങളുടെ പരാതി ശ്രദ്ധയിൽപ്പെട്ടുവെന്നും ഇക്കാര്യത്തിൽ പോലീസ് അന്വേഷണം നടത്തുന്നുണ്ടെന്നും അദ്ദേഹം പറഞ്ഞു.
മാത്രമല്ല വിദ്യാഭ്യാസ അധികൃതരോടും കാര്യങ്ങൾ അന്വേഷിച്ചറിയാൻ നിർദ്ദേശം നൽകിയിട്ടുണ്ട്.ഇക്കാര്യത്തിൽ പ്രിയപ്പെട്ട കുഞ്ഞുങ്ങൾ വിഷമിക്കേണ്ട എന്നും നിങ്ങളോടൊപ്പം ഉണ്ടെന്നുമാണ് മന്ത്രി പറയുന്നത്.
https://www.facebook.com/share/p/1EisJijbAt/
