തമിഴ്നാട് ഗവര്ണര് ഡോ. ആര് എന് രവി, ബില്ലുകള് തടഞ്ഞുവെച്ച ശേഷം രാഷ്ട്രപതിക്ക് അയച്ച നടപടി സുപ്രീംകോടതി റദ്ദാക്കി. ഭരണഘടന നിലവില് വന്ന ശേഷം ഗവര്ണര്ക്ക് വിവേചനാധികാരമില്ലെന്നും ഗവര്ണ്ണര് മന്ത്രിസഭയുടെ ഉപദേശമനുസരിച്ച് പ്രവര്ത്തിക്കണമെന്നും സുപ്രീം കോടതി വ്യക്തമാക്കി.
ബില്ലുകളില് തീരുമാനമെടുക്കാൻ സമയ പരിധി നല്കിയ കോടതി, ബില് തടഞ്ഞുവെച്ചാല് ഒരുമാസത്തിനകം തീരുമാനമെടുക്കണമെന്നും ആവശ്യപ്പെട്ടു. തീരുമാനമെടുത്തില്ലെങ്കില് മൂന്ന് മാസത്തിനകം മന്ത്രിസഭയ്ക്ക് തിരിച്ചയക്കണമെന്നും സുപ്രീം കോടതി പറഞ്ഞു. നിയമസഭ രണ്ടാമതും അംഗീകരിച്ച ബില്ലില് മൂന്ന് മാസത്തിനകം തീരുമാനമെടുക്കണമെന്നും ഗവര്ണറുടെ നടപടി കോടതിയുടെ പരിശോധനയ്ക്ക് വിധേയമെന്നും സുപ്രീം കോടതി പറഞ്ഞു.
