തിരുവനന്തപുരം: സംസ്ഥാനത്ത് തുടരുന്ന ശക്തമായ കാലവർഷം വൻതോതിൽ നാശനഷ്ടം വിതച്ചതായി റവന്യൂ മന്ത്രി അഡ്വ. കെ. രാജൻ വാർത്താസമ്മേളനത്തിൽ അറിയിച്ചു. അടുത്ത അഞ്ച് ദിവസം പടിഞ്ഞാറൻ കാറ്റ് കേരളത്തിന് മുകളിൽ തുടരുമെന്നും വ്യാപക മഴയ്ക്ക് സാധ്യതയുള്ളതിനാലും പൊതുജനങ്ങൾ ജാഗ്രത പാലിക്കണമെന്ന് മന്ത്രി ആവശ്യപ്പെട്ടു. മെയ് 31 മുതൽ ജൂൺ 5 വരെ എല്ലാ ജില്ലകളിലും ശക്തമായ മഴയും ജൂൺ 6 മുതൽ 12 വരെ സാധാരണ മഴയും പ്രതീക്ഷിക്കുന്നതായി കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. അനാവശ്യ യാത്രകൾ, പ്രത്യേകിച്ച് മലയോര മേഖലകളിലേക്കുള്ളവ, ഒഴിവാക്കണമെന്നും അപകടകരമായ സ്ഥലങ്ങളിൽ താമസിക്കുന്നവർ സുരക്ഷിത സ്ഥലങ്ങളിലേക്ക് മാറണമെന്നും മന്ത്രി നിർദേശിച്ചു. സംസ്ഥാനത്ത് 66 ദുരിതാശ്വാസ ക്യാമ്പുകളിൽ 1,894 പേർ താമസിക്കുന്നുണ്ട്.
തിരുവനന്തപുരം ജില്ലയിൽ കഴിഞ്ഞ ആറ് ദിവസത്തെ ശക്തമായ മഴയും കാറ്റും 144 വീടുകൾ തകർത്തു. 138 വീടുകൾ ഭാഗികമായും 6 വീടുകൾ പൂർണമായും നശിച്ചു. കേരള തീരത്ത് 3.0 മുതൽ 3.9 മീറ്റർ വരെ ഉയർന്ന തിരമാലയ്ക്ക് സാധ്യതയുള്ളതിനാൽ കാപ്പിൽ മുതൽ പൊഴിയൂർ വരെ റെഡ് അലർട്ട് പ്രഖ്യാപിച്ചു. മത്സ്യത്തൊഴിലാളികൾക്കും തീരദേശവാസികൾക്കും അതീവ ജാഗ്രതാ നിർദേശം നൽകിയിട്ടുണ്ട്. മഴക്കാല മുന്നൊരുക്കത്തിനായി ഗ്രാമപഞ്ചായത്തുകൾക്ക് ഒരു ലക്ഷവും മുനിസിപ്പാലിറ്റികൾക്ക് 3 ലക്ഷവും കോർപ്പറേഷനുകൾക്ക് 5 ലക്ഷവും അനുവദിച്ചു.
എറണാകുളം ജില്ലയിൽ കുമ്പളം ഫെറിയിൽ വള്ളം മറിഞ്ഞ് ഒരാൾ കാണാതായി. നോർത്ത് പറവൂർ സ്വദേശി രാധാകൃഷ്ണനെ (62) കണ്ടെത്താൻ തിരച്ചിൽ തുടരുന്നു. തൊഴിലുറപ്പ് ജോലി കഴിഞ്ഞ് വീട്ടിലേക്ക് മടങ്ങുമ്പോൾ മരം വീണ് അടിയിൽപെട്ട് തിരുമാറാടി അമ്മാംകുളത്തിൽ അന്നക്കുട്ടി (85) മരണപ്പെട്ടു. കഴിഞ്ഞ ഏഴ് ദിവസത്തെ മഴയിൽ 216 വീടുകൾ തകർന്നു, 3 വീടുകൾ പൂർണമായും 213 വീടുകൾ ഭാഗികമായും നശിച്ചു.
തൃശ്ശൂർ ജില്ലയിൽ മെയ് 30 വരെയുള്ള കണക്കനുസരിച്ച് 4 വീടുകൾ പൂർണമായും 177 വീടുകൾ ഭാഗികമായും തകർന്നു. വ്യാഴാഴ്ച മാത്രം 1 വീട് പൂർണമായും 13 വീടുകൾ ഭാഗികമായും നശിച്ചു. 7 ദുരിതാശ്വാസ ക്യാമ്പുകളിൽ 18 കുടുംബങ്ങളിലെ 64 പേർ, അതിൽ 17 കുട്ടികൾ, താമസിക്കുന്നു. കെ.എസ്.ഇ.ബിക്ക് 2960.3 ലക്ഷം രൂപയുടെ നഷ്ടമാണ് കണക്കാക്കിയിരിക്കുന്നത്. 748.82 ലക്ഷം രൂപയുടെ കൃഷിനാശം ജില്ലയിൽ ഉണ്ടായതായാണ് കണക്കാക്കിയിരിക്കുന്നത്.
കോട്ടയം ജില്ലയിൽ 36 ദുരിതാശ്വാസ ക്യാമ്പുകളിൽ 675 പേർ താമസിക്കുന്നു. 210 കുടുംബങ്ങളെ സുരക്ഷിത കേന്ദ്രങ്ങളിലേക്ക് മാറ്റി. മലങ്കര ഡാമിന്റെ ഷട്ടറുകൾ ഘട്ടംഘട്ടമായി തുറക്കുന്നതിനാൽ മൂവാറ്റുപുഴയാർ തീരത്തുള്ളവർക്ക് ജാഗ്രതാ നിർദേശം നൽകി. മെയ് 31ന് ജില്ലയിലെ എല്ലാ വിദ്യാഭ്യാസ സ്ഥാപനങ്ങൾക്കും അവധി പ്രഖ്യാപിച്ചു. കെഎസ്ഇബിക്ക് 7.9 കോടി രൂപയുടെ നഷ്ടമുണ്ടായി.
ഇടുക്കി ജില്ലയിൽ 14 ദുരിതാശ്വാസ ക്യാമ്പുകൾ തുറന്നു, 130 വീടുകൾ തകർന്നു. 121 വീടുകൾ ഭാഗികമായും 9 വീടുകൾ പൂർണമായും നശിച്ചു. കനത്ത കാറ്റിൽ മരം വീണ് ഒരാൾ മരിച്ചു. 5.48 കോടി രൂപയുടെ കൃഷിനാശവും റിപ്പോർട്ട് ചെയ്തു. മണ്ണിടിച്ചിലിനും ഉരുൾപൊട്ടലിനും സാധ്യതയുണ്ട്.
പത്തനംതിട്ട ജില്ലയിൽ 18 ദുരിതാശ്വാസ ക്യാമ്പുകളിൽ 321 പേർ താമസിക്കുന്നു. 197 വീടുകൾ ഭാഗികമായും 4 വീടുകൾ പൂർണമായും തകർന്നു. കെഎസ്ഇബിക്ക് 68.2 ലക്ഷം രൂപയുടെ നഷ്ടവും 2.52 കോടി രൂപയുടെ കൃഷിനാശവും ഉണ്ടായി. വെള്ളം കയറിയതിനാൽ പെരിങ്ങര, നെടുംപുറം കൃഷി ഭവൻ ഓഫീസുകളുടെ പ്രവർത്തനം താൽക്കാലികമായി തിരുവല്ല എസിഎ ഓഫീസിലേക്ക് മാറ്റി.
കൊല്ലം ജില്ലയിൽ 164 വീടുകൾ ഭാഗികമായും 6 വീടുകൾ പൂർണമായും തകർന്നു. അപകടകരമായ മരങ്ങൾ മുറിച്ചുമാറ്റാൻ ജില്ലാ കളക്ടർ ഉത്തരവിട്ടു. മെയ് 31ന് എല്ലാ വിദ്യാഭ്യാസ സ്ഥാപനങ്ങൾക്കും അവധി പ്രഖ്യാപിച്ചു.
കാസർകോട് ജില്ലയിൽ ചിത്താരി പുഴയിലെ ബണ്ട് ഭാഗികമായി നീക്കംചെയ്തു. മൊഗ്രാൽ നദിയിലെ മധൂർ, നീലേശ്വരം നദിയിലെ ചായ്യോം സ്റ്റേഷൻ, ഉപ്പള നദിയിലെ ഉപ്പള സ്റ്റേഷൻ എന്നിവിടങ്ങളിൽ ഓറഞ്ച് അലർട്ടും കാര്യങ്കോട് നദിയിലെ ഭീമ നദി സ്റ്റേഷനിൽ മഞ്ഞ അലർട്ടും പ്രഖ്യാപിച്ചു. 3.5 മുതൽ 3.8 മീറ്റർ വരെ ഉയർന്ന തിരമാലയ്ക്ക് സാധ്യതയുള്ളതിനാൽ ഓറഞ്ച് അലർട്ട് നൽകി. 326 പേരെ ബന്ധുവീടുകളിലേക്ക് മാറ്റി.
വയനാട് ജില്ലയിൽ മാനന്തവാടി താലൂക്കിൽ ഏറ്റവും കൂടുതൽ നാശനഷ്ടമുണ്ടായി. 13 വീടുകൾ ഭാഗികമായും ഒരു വീട് പൂർണമായും തകർന്നു. ജില്ലയിൽ 242.74 ഹെക്ടർ കൃഷി നശിച്ചു, 2199.35 ലക്ഷം രൂപയുടെ നഷ്ടം കണക്കാക്കുന്നു. വാഴയും നെല്ലും ഉൾപ്പെടെയുള്ള വിളകൾക്കാണ് പ്രധാനമായും നാശനഷ്ടമുണ്ടായത്.
ആലപ്പുഴ ജില്ലയിൽ മെയ് 30ന് 19 വീടുകൾ ഭാഗികമായി തകർന്നു. അമ്പലപ്പുഴ, കുട്ടനാട്, ചേർത്തല താലൂക്കുകളിൽ നാശനഷ്ടം റിപ്പോർട്ട് ചെയ്തു. 7 ക്യാമ്പുകളിൽ 122 കുടുംബങ്ങളെ പാർപ്പിച്ചു. മഞ്ഞ അലർട്ട് പ്രഖ്യാപിച്ചതിനാൽ ജാഗ്രത തുടരണമെന്ന് അധികൃതർ അറിയിച്ചു.
പാലക്കാട് ജില്ലയിൽ കാലവർഷം 23 വീടുകൾ കൂടി തകർത്തു. 20 വീടുകൾ ഭാഗികമായും 3 വീടുകൾ പൂർണമായും നശിച്ചു. മെയ് 29ന് ഉച്ചയ്ക്ക് ഒരു മണി മുതൽ മെയ് 30 ഉച്ചയ്ക്ക് 2.30 വരെയുള്ള കണക്കാണിത്. ഇതോടെ ജില്ലയിൽ കാലവർഷത്തിൽ തകർന്ന വീടുകളുടെ എണ്ണം 202 ആയി. പാലക്കാട്, ചിറ്റൂർ, മണ്ണാർക്കാട്, പട്ടാമ്പി, ഒറ്റപ്പാലം, ആലത്തൂർ താലൂക്കുകളിൽ നാശനഷ്ടം റിപ്പോർട്ട് ചെയ്തു. മെയ് 29 മുതൽ 30 വരെ ജില്ലയിൽ ശരാശരി 56.32 മില്ലിമീറ്റർ മഴ പെയ്തു.
കോഴിക്കോട് ജില്ലയിൽ കക്കയം ഡാമിൽ ജലനിരപ്പ് 756.7 മീറ്ററിലെത്തിയതിനാൽ ഓറഞ്ച് അലർട്ട് പ്രഖ്യാപിച്ചു. അധികജലം ഒഴുക്കിവിടുമെന്ന് അധികൃതർ അറിയിച്ചു. ശക്തമായ മഴയും കാറ്റും ജില്ലയിൽ തുടരുന്നതിനാൽ ജനങ്ങൾക്ക് ജാഗ്രതാ നിർദേശം നൽകിയിട്ടുണ്ട്.
കണ്ണൂർ ജില്ലയിൽ ശക്തമായ മഴയെ തുടർന്ന് താഴ്ന്ന പ്രദേശങ്ങളിലെ വീടുകളിൽ വെള്ളം കയറി. നിരവധി കുടുംബങ്ങളെ സുരക്ഷിത സ്ഥലങ്ങളിലേക്ക് മാറ്റി. ശനിയാഴ്ച മുതൽ നാല് ദിവസം മഞ്ഞ അലർട്ട് പ്രഖ്യാപിച്ചു. താവക്കര, പുഴാതി, മുഴപ്പിലങ്ങാട് തുടങ്ങിയ പ്രദേശങ്ങളിൽ വെള്ളപ്പൊക്ക ഭീഷണിയെ തുടർന്ന് കുടുംബങ്ങളെ ബന്ധുവീടുകളിലേക്കും ക്യാമ്പുകളിലേക്കും മാറ്റി. തലശ്ശേരിയിൽ ദുരിതാശ്വാസ ക്യാമ്പ് തുറന്നു.
