തിരുവനന്തപുരം: അഹമ്മദാബാദിലുണ്ടായ വിമാനപകടത്തില് മരണപ്പെട്ട രഞ്ജിത ജി നായരെ അപമാനിച്ച് ഫേസ്ബുക്ക് പോസ്റ്റിട്ട വെള്ളരിക്കുണ്ട് ജൂനിയര് സൂപ്രണ്ട് എ പവിത്രനെതിരെ കടുത്ത ശിക്ഷാ നടപടികള് ആരംഭിക്കുവാന് നിർദേശം നൽകി. റവന്യു വകുപ്പ് മന്ത്രി കെ രാജൻ ആണ് ലാന്റ് റവന്യൂ കമ്മീഷണര്ക്ക് നിർദേശം നൽകിയിരിക്കുന്നത്.
പവിത്രനെതിരെ കടുത്ത ശിക്ഷാ നടപടികള് ആരംഭിക്കുന്നതിനുള്ള സര്വ്വീസ് റൂള് പ്രകാരമുള്ള നടപടി ക്രമങ്ങള് ആരംഭിക്കുവാന് ലാന്റ് റവന്യൂ കമ്മീഷണര്ക്ക് മന്ത്രി നിര്ദ്ദേശം നല്കിയിരിക്കുകയാണ്. ഇതിന്റെ ഭാഗമായി പവിത്രന് മെമ്മോ നല്കും. മെമ്മോയ്ക്ക് ലഭിക്കുന്ന മറുപടി അനുസരിച്ചായിരിക്കും മറ്റു നടപടികളിലേക്ക് കടക്കുക.
വെള്ളരിക്കുണ്ട് ഡെപ്യൂട്ടി സൂപ്രണ്ടായ പവിത്രന് നിലവില് അന്വേഷണവിധേയമായി സസ്പെൻഷനിലാണ്. വിമാന അപകടത്തില് അനുശോചിച്ച് മറ്റൊരാള് ഇട്ട ഫേസ്ബുക്ക് പോസ്റ്റിന് താഴെയാണ് ഇയാള് രഞ്ജിതയെ അപമാനിക്കുന്ന വിധത്തില് കമന്റുകള് രേഖപ്പെടുത്തിയത്. വിഷയം ശ്രദ്ധയില്പ്പെട്ടയുടനെ തന്നെ റവന്യൂ മന്ത്രി കെ രാജന് പവിത്രനെ സസ്പെന്റ് ചെയ്യുവാന് ഉത്തരവിടുകയായിരുന്നു. പിന്നാലെ ജാമ്യമില്ലാവകുപ്പ് പ്രകാരം കേസെടുത്ത് പവിത്രനെ പൊലീസ് അറസ്റ്റ് ചെയ്തിരുന്നു.
