തിരുവനന്തപുരം: പ്രതിയെ പിടികൂടാനെത്തിയ പൊലീസുകാരനെ യുവാവ് കടിച്ച് പരിക്കേൽപ്പിച്ചു. തിരുവനന്തപുരം വിഴിഞ്ഞത്താണ് സംഭവം നടന്നത്. വെങ്ങാനൂർ കരയടി വിള സ്വദേശി മുഹമ്മദ് ഷാഫിൻ (25) ആണ് പോലീസിനെ ആക്രമിച്ചത്.
മുഹമ്മദ് ഷാഫിനെതിരെ പരാതി ലഭിച്ചതിനെ തുടർന്ന് പ്രതിയെ അന്വേഷിച്ചെത്തിയതായിരുന്നു പോലീസ്. പ്രതി പിതാവിനെ മർദിക്കുകയും വീട്ടുപകരണങ്ങൾ നശിപ്പിപ്പിക്കുകയും ചെയ്തുവെന്നാണ് പരാതിയിൽ പറഞ്ഞിരുന്നത്.
തിങ്കളാഴ്ച രാത്രിയായിരുന്നു സംഭവം നടന്നത്. ഷാഫിൻ പിതാവിനെ മർദ്ദിച്ചതായി പൊലീസിന് ലഭിച്ച വിവരത്തിന്റെ അടിസ്ഥാനത്തിൽ ഇയാളുടെ വീട്ടിലേക്ക് എത്തുകയായിരുന്നു. തുടർന്ന് വീട്ടിലെത്തിയ പൊലീസുകാരൻ പിതാവിനെ ആശുപത്രിയിലേക്ക് കൊണ്ടുപോകാൻ ശ്രമിച്ചു. ഇതിനിടെയാണ് ഇയാൾ പൊലീസിന് നേർക്ക് അസഭ്യം പറയുകയും ആക്രമിക്കുകയും ചെയ്തത്.
മദ്യലഹരിയിലായിരുന്ന പ്രതിയെ ബലം പ്രയോഗിച്ച് അറസ്റ്റ് ചെയ്തു. സംഭവത്തിൽ വിഴിഞ്ഞം സ്റ്റേഷനിലെ സിപിഒ യായ കണ്ണന് (38) വലതുകൈയിൽ കടിയേൽക്കുകയും മൂക്കിൽ ഇടിച്ച് പരിക്കേൽക്കുകയും ചെയ്തു.
