തിരുവനന്തപുരം: തിരുവനന്തപുരത്ത് ഡ്രൈഡേയിലടക്കം മദ്യവിൽപ്പന നടത്തുന്നയാളെ പിടികൂടി എക്സൈസ്. നെടുമങ്ങാട് വിതുര പ്രദേശങ്ങളിലാണ് ഇയാൾ കൂടുതലായും വിൽപന നടത്തിയിരുന്നത്. കൂടം ബാബു എന്ന് വിളിക്കുന്ന ബാബുവാണ് (60) അറസ്റ്റിലായത്.
മരുതാമല പോസ്റ്റ് ഓഫീസ് ജംഗ്ഷന് സമീപമുള്ള വീട്ടിൽ നിന്നും 25 ലിറ്റർ ഇന്ത്യൻ നിർമ്മിത വിദേശ മദ്യം വിൽപ്പനയ്ക്കായി സൂക്ഷിച്ച നിലയിൽ കണ്ടെത്തിയിരുന്നു. കൂടാതെ മദ്യം കടത്തുവാനുപയോഗിച്ച ബൈക്കും മദ്യവിൽപ്പനയിലൂടെ ലഭിച്ച 10000 രൂപയും പിടിച്ചെടുത്തു.
നെടുമങ്ങാട് റേഞ്ച് എക്സൈസ് സംഘമാണ് ഇയാളെ പിടികൂടിയത്. പ്രദേശത്ത് മദ്യഷോപ്പുകൾ അടച്ച ശേഷവും ബാബുവിനെ സമീപിച്ചാൽ ബ്ലാക്കിൽ മദ്യം ലഭിക്കുമായിരുന്നു. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.
