പോത്തൻകോട് : ചേച്ചി മരിച്ചതറിഞ്ഞ് എത്തിയ സഹോദരി മൃതദേഹത്തിനരികിൽ കുഴഞ്ഞു വീണു മരിച്ചു. പോത്തൻകോട് പാലോട്ടു കോണം ലക്ഷം വീടിനു സമീപമാണ് സംഭവം. പാലോട്ടുകോണം രാധാ മന്ദിരത്തിൽ പരേതനായ ജോൺസന്റെ ഭാര്യ രാധ (74) ആണ്
വെളുപ്പിന് 2 മണിക്ക് മരിച്ചത്. ചേങ്കോട്ടുകോണം കല്ലടിച്ചവിള ശൈലജ ഭവനിൽ താമസിക്കുന്ന പരേതനായ മണിയൻ്റെ ഭാര്യ ശൈലജ ഇവരുടെ സഹോദരിയാണ്. വെളുപ്പിനെ മരണ വിവരം അറിഞ്ഞു സഹോദരിയുടെ മൃതദേഹത്തിനരികിൽ എത്തിയ ശൈലജ(65) അവിടെ കുഴഞ്ഞുവീഴുകയായിരുന്നു.
ഉടൻതന്നെ ആശുപത്രിയിൽ എത്തിച്ചുവെങ്കിലും മരണം സംഭവിച്ചിരുന്നു. ഹൃദയാഘാതമാണ് മരണകാരണം. രണ്ടു സഹോദരങ്ങളും തമ്മിൽ വലിയ ഐക്യവും സ്നേഹവുമായിരുന്നുവെന്നു ബന്ധുക്കൾ പറഞ്ഞു. ഇരുവരുടെയും അന്ത്യ കർമ്മങ്ങൾ ഒരിടത്തു തന്നെ നടത്തിയ ശേഷം മൃതദേഹങ്ങൾ നെടുമങ്ങാട് ശാന്തിതീരത്തിൽ സംസ്കരിച്ചു. രമയാണ് രാധയുടെ മകൾ,മരുമകൻ ശ്യാമളൻ. ശൈലജയുടെ മകൻ ചിഞ്ചു.
