പോത്തൻകോട്: യുവതിയ്ക്ക് നേരെ ബാങ്ക് മാനേജരുടെ നഗ്നത പ്രദർശനമെന്ന് ആരോപണം. വായ്പ എടുക്കാൻ പോയ യുവതിയെ കയറി പിടിക്കുകയും നഗ്നത പ്രദർശനം നടത്തുകയും ചെയ്തുവെന്ന് യുവതി പരാതി നൽകി. വെമ്പായം സർവീസ് സഹകരണ ബാങ്കിലെ കന്യാകുളങ്ങര ബ്രാഞ്ചിലെ മാനേജർ സുനിൽ കുമാറിനെതിരെയാണ് യുവതിയുടെ പരാതി. യുവതിയുടെ പരാതിയുടെ അടിസ്ഥാനത്തിൽ വട്ടപ്പാറ പോലീസ് സുനിൽ കുമാറിനെതിരെ കേസ് രജിസ്റ്റർ ചെയ്തു.
ജനുവരി 6 ന് വൈകിട്ട് മൂന്നര മണിയോടെയാണ് സംഭവം. ഭൂമി ഈട് വച്ച് വായ്പ്പ എടുക്കാനാണ് യുവതി ബാങ്കിനെ സമീപിച്ചത്. ഇതേ തുടർന്ന് യുവതിയോട് ഈട് നൽകുന്ന ഭൂമി സന്ദർശിക്കണമെന്ന് മാനേജർ ഫോണിൽ കൂടി ആവശ്യപ്പെട്ടു. തുടർന്ന് യുവതിയുടെ വീട്ടിൽ നിന്നും കുറച്ച് മാറിയുള്ള ഭൂമിയിൽ മൂന്ന് മണിയോടെ എത്താനും ആവശ്യപ്പെട്ടു.
ഭൂമി പരിശോദിക്കാനെത്തിയ മാനേജർ അവിടെ എത്തിയ യുവതിയെ കാര്യങ്ങൾ പറയുന്നതിനിടയിൽ കടന്നു പിടിക്കുകയായിരുന്നു. തുടർന്ന് യുവതി കുതറി മാറി സുനിൽ കുമാറിനോട് തട്ടി കയറുകയും എന്നാൽ ഭൂമിയുടെ രേഖകൾ പരിശോധിക്കുന്നതിനിടയിൽ യുവതിയോട് ഇങ്ങോട്ട് നോക്കൂ എന്ന് പറഞ്ഞ് സുനിൽകുമാർ മുണ്ട് അഴിച്ച് കാണിക്കുകയും ഭർത്താവ് ഇല്ലാത്ത ദിവസം അറിയിച്ചാൽ വീട്ടിൽ വരാമെന്ന് പറയുകയും ചെയ്തു എന്നാണ് യുവതി വട്ടപ്പാറ പോലീസിൽ നൽകിയ പരാതിയിൽ പറയുന്നത്.
സി പി എം ബ്രാഞ്ച് അംഗമാണ് യുവതി. ജനുവരി 10 ന് ആദ്യം പാർട്ടി ബ്രാഞ്ച് സെക്രട്ടറിക്ക് പരാതി നൽകുകയും തുടർന്ന് യുവതി 31 ന് ബാങ്ക് ഭരണ സമിതിക്ക് പരാതി നൽകുകയും ചെയ്തു. പാർട്ടി നടത്തിയ അന്വേഷണത്തിൽ പരാതിയിൽ കഴമ്പുണ്ടെന്ന് കണ്ടതിനെ തുടർന്ന് സുനിൽകുമാറിനെ അയിരൂപ്പാറ ബ്രാഞ്ചിലേക്ക് സ്ഥലം മാറ്റുകയും ചെയ്തു. പ്രതിയായ സുനിൽകുമാർ യുവതിയെ ഫോണിൽ വിളിച്ച് തെറ്റുപറ്റിയെന്നും രണ്ടു പേർക്കും കുടുംബമുണ്ട് എന്നും മാപ്പ് തരണമെന്നും പറഞ്ഞു. ഈ കഴിഞ്ഞ 9 ന് യുവതി വട്ടപ്പാറ പോലീസിൽ പരാതി നൽകുകയും പോലീസ് കേസ് രജിസ്റ്റർ ചെയ്യുകയും ചെയ്തു.
