തിരുവനന്തപുരം: യുവതിയെ ഭര്തൃഗൃഹത്തില് മരിച്ച നിലയില് കണ്ടെത്തി. തെന്നൂര്കോണം സ്വദേശി പ്രിന്സി(32)യാണ് മരിച്ച നിലയിൽ കണ്ടെത്തിയത്. വിഴിഞ്ഞം കോട്ടപ്പുറം കരിമ്പള്ളിക്കര ദില്ഷാ ഭവനിൽ ശനിയാഴ്ച രാത്രി 9ഓടെയാണ് സംഭവം. ഭര്ത്താവ് അന്തോണി ദാസ് (36) പൊലീസിൽ കീഴടങ്ങി. ശനിയാഴ്ച രാത്രിയിലായിരുന്നു പ്രിന്സിയുടെ മൃതദേഹം കണ്ടെത്തിയത്. മകനാണ് പ്രിന്സിയുടെ മൃതദേഹം ആദ്യം കണ്ടത്.
കുടുംബ പ്രശ്നത്തെ തുടർന്ന് കഴിഞ്ഞ ഒരു മാസമായി ഇരുവരും അകന്ന് താമസിക്കുകയായിരുന്നു. സംഭവ ദിവസം അന്തോണി ഭാര്യയേയും മക്കളേയും തങ്ങളുടെ വീട്ടിലേക്ക് കൂട്ടിക്കൊണ്ട് വന്നു. വീട്ടിലെത്തിയ ഉടൻ അന്തോണി കുട്ടികളെ കളിക്കാന് പുറത്തേക്ക് പറഞ്ഞു വിടുകയും ചെയ്തുവെന്നാണ് വിഴിഞ്ഞം പോലീസ് പറയുന്നത്.
കളികഴിഞ്ഞ് വീട്ടിലെത്തിയ മകന് അകത്തെ മുറിയില് ജീവനില്ലാതെ കിടക്കുന്ന അമ്മയെയാണ് കണ്ടത്. മകൻ നിലവിളിച്ചതിനെ തുടർന്ന് അയൽവാസികളെത്തി പ്രിൻസിയെ വിഴിഞ്ഞം സാമൂഹ്യാരോഗ്യ കേന്ദ്രത്തിലെത്തിക്കുകയായിരുന്നു. കഴുത്തിലെ പാട് കണ്ട ആശുപത്രി അധികൃതർ പൊലീസിനെ വിവരമറിയിക്കുകയായിരുന്നു. തുടർന്ന് വിഴിഞ്ഞം എസ് എച്ച് ഒ പ്രജീഷ് ശശിയുടെ നേതൃത്വത്തിലുള്ള സംഘം സ്ഥലത്തെത്തി മൃതദേഹം മെഡിക്കൽ കോളജിൽ എത്തിച്ച് പോസ്റ്റുമോർട്ടത്തിനുശേഷം ബന്ധുക്കൾക്ക് വിട്ടു നൽകി.
ശ്വാസം മുട്ടിയാണ് മരിച്ചതെന്ന് ഡോക്ടര്മാര് സ്ഥിരീകരിച്ചു. സംഭവം നടന്ന രാത്രിയില് കളി കഴിഞ്ഞ് തിരിച്ചെത്തിയ മകന് വീട്ടില് നിന്ന് അച്ഛന് ഇറങ്ങിപ്പോകുന്നതായി കണ്ടുവെന്ന് പൊലീസിനോട് പറഞ്ഞു.
