ശ്രീകാര്യം : റോഡ് മുറിച്ചു കടക്കവേ സ്വകാര്യ സ്ക്കൂൾ വാൻതട്ടി വൃദ്ധ മരിച്ചു. ശ്രീകാര്യം
മടത്തുനട നമ്പ്യാർ കോണം വീട്ടിൽ പരേതനായ ഉണ്ണികൃഷ്ണൻ നായരുടെ ഭാര്യ രാധമ്മ (83) ആണ് മരിച്ചത്. തിങ്കളാഴ്ച രാവിലെ 8.30 ഓടുകൂടി ശ്രീകാര്യം ജംഗ്ഷനിൽ ആയിരുന്നു അപകടം.
റോഡ് മുറിച്ചു കടക്കവേ ലയോള സ്കൂളിൽ കുട്ടികളെ ഇറക്കിയ ശേഷം ലയോള ഭാഗത്തുനിന്ന് വന്ന സ്ക്കൂൾവാൻ ഇവരെ ഇടിക്കുകയായിരുന്നു. ഇടിയുടെ ആഘാതത്തിൽ തലയ്ക്ക് ഗുരുതരമായി പരിക്കേറ്റ ഇവർ സംഭവ സ്ഥലത്തുവച്ചു തന്നെ മരിച്ചു.
അപകടത്തിന് ശേഷം അരമണിക്കൂറോളം റോഡിൽ കിടന്ന രാധമ്മയെ ഓടി കൂടിയ ഹെഡ് ലോഡ് യൂണിയൻ തൊഴിലാളികളും മറ്റ് കടക്കാരും ചേർന്നാണ് മെഡിക്കൽ കോളേജിൽ എത്തിച്ചതെന്നാണ് ദൃക്സാക്ഷികൾ പറയുന്നത്. വർഷങ്ങളായി ശ്രീകാര്യം ചന്തയിൽ വഴിയോരക്കച്ചവടം നടത്തിവരികയായിരുന്നു മരിച്ച രാധമ്മ. മക്കൾ: ശ്രീലത, ശ്രീകല, പരേതരായ രാജേശ്വരി , അമ്മിണിക്കുട്ടൻ. ശ്രീകാര്യം പോലീസ് കേസെടുത്തു.
