തിരുവനന്തപുരം: തിരുവനന്തപുരം നഗരത്തിൽ വീണ്ടും യുവതിക്ക് നേരെ ആക്രമണം. തമ്പാനൂരിൽ റോഡിലൂടെ നടന്നു പോവുകയായിരുന്ന ഗർഭിണിക്ക് നേരെയാണ് ആക്രമണമുണ്ടായത്. ഇന്ന് ഉച്ചക്കാണ് സംഭവം നടന്നത്. പിന്തുടർന്ന് സ്പർശിച്ചുവെന്നാണ് പരാതിയിൽ പറയുന്നത്.
നെടുമങ്ങാട് സ്വദേശിയായ യുവതി ജോലിസ്ഥലത്തേക്ക് നടന്നു പോകവെ 40 വയസ് തോന്നിപ്പിക്കുന്ന ആൾ കടന്നു പിടിക്കുകയായിരുന്നു. യുവതി ഒച്ച വച്ചതോടെ ഇയാൾ ഓടി രക്ഷപെട്ടു. സംഭവത്തിൽ യുവതി പൊലീസിൽ പരാതി നൽകി.എന്നാൽ രേഖാ മൂലം സംഭവം അറിയിച്ചു എങ്കിലും കേസെടുക്കാൻ താത്പര്യമില്ല എന്നായിരുന്നു യുവതിയുടെ നിലപാട്.
എന്നാൽ വിവരം ലഭിച്ചതിന്റെ അടിസ്ഥാനത്തിൽ പൊലീസ് സ്വമേധയാ കേസെടുത്ത് അന്വേഷണം ആരംഭിച്ചിട്ടുണ്ട്. സിസിടിവി ദൃശ്യങ്ങൾ കേന്ദ്രീകരിച്ചാണ് അന്വേഷണം.
