തിരുവനന്തപുരം: അതിവേഗ റെയിൽ പദ്ധതിയിൽ സംസ്ഥാനത്തിന്‍റെ പ്രഥമ പരിഗണന കെ- റെയിലിനു തന്നെയാണെന്ന് ആവർത്തിച്ച് മുഖ്യമന്ത്രി പിണറായി വിജയൻ. ഇ. ശ്രീധരന്‍റെ ശുപാർശ പരിശോധിക്കുമെന്നും മുഖ്യമന്ത്രി നിയമസഭയിൽ വ്യക്തമാക്കി. മോൻസ് ജോസഫ് നിയമസഭയിൽ ഉന്നയിച്ച ചോദ്യത്തിന് മറുപടി നൽകുകയായിരുന്നു അദ്ദേഹം.
കെ- റെയിലിൽ നിന്നും കേരളം ഇപ്പോൾ പിന്നോട്ടു പോയിരിക്കുന്നത് കേന്ദ്രത്തിന്‍റെ അനുമതി ലഭിക്കാത്തതിനാലാണ്. പദ്ധതി പൂർണമായി ഉപേക്ഷിച്ചെന്ന തരത്തിലുള്ള ഒരു തീരുമാനവും നിലവിൽ സർക്കാർ എടുത്തിട്ടില്ല. കേന്ദ്രത്തിന്‍റെ അനുമതി ലഭിക്കാത്തതും സംസ്ഥാനത്തുടനീളമായ പ്രതിഷേധവും നിലവിലെ സാഹചര്യത്തിൽ കെ-റെയിലിൽ നിന്നും സർക്കാരിനെ പിന്നോട്ടു വലിച്ചതെന്നും മുഖ്യമന്ത്രി മറുപടി നൽകി.
