മത്സ്യബന്ധനത്തിന് പോകുന്നതിനിടെ ബോട്ടിലെ ഇരുമ്പ് കപ്പി തലയിൽ വീണ് മത്സ്യതൊഴിലാളി മരിച്ചു.
തിരുവനന്തപുരം കഠിനംകുളം പുതുക്കുറുച്ചി തെരുവിൽ തൈവിളാകം വീട്ടിൽ മുഹമ്മദ് കുഞ്ഞിൻ്റെ മകൻ നൗഫൽ (38) ആണ് മരിച്ചത്.
ഇന്ന് രാവിലെ 10 മണിയോടെ പെരുമാതുറ മുതലപ്പൊഴിയിലാണ് സംഭവം.
പുതുക്കുറുച്ചി സ്വദേശി ഷാജിയുടെ ഉടമസ്ഥതയിലുള്ള ബോട്ടിൽ മത്സ്യബന്ധനത്തിന് പോകുന്നതിനിടെ അഴിമുഖം പിന്നിട്ട ശേഷമായിരുന്നു അപകടം.
ശക്തമായ തിരയിൽ ബോട്ടിലെ ഇരുമ്പ് കപ്പി നൗഫലിൻ്റെ തലക്ക് പുറകിൽ വീഴുകയായിരുന്നു. ബോധരഹിതനായി നൗഫലിനെ കരക്കെത്തിച്ച ശേഷം ആദ്യം ചിറയിൻകീഴ് താലൂക്ക് ആശുപത്രിയിലും തുടർന്ന് മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
മൃതദേഹം മെഡിക്കൽ കോളേജ് മോർച്ചറിയിൽ.
