വിളപ്പിൽശാല: കെഎസ്ആർടിസി ബസ് ഡ്രൈവറെ മർദ്ദിച്ച കേസിലെ പ്രതി അറസ്റ്റിൽ. വിളപ്പിൽശാല പുളിയറ കോണത്ത് വച്ച് കെഎസ്ആർടിസി ബസ് ഡ്രൈവറെ ബസ്സിനകത്ത് കയറി ആക്രമിച്ച് പരിക്കേൽപ്പിച്ച കേസിലെ പ്രതിയെയാണ് പോലീസ് അറസ്റ്റ് ചെയ്തത്. പുളിയറക്കോണം സ്വദേശി 33 വയസ്സുള്ള സുബ്രഹ്മണ്യനെയാണ് വിളപ്പിൽശാല പോലീസ് അറസ്റ്റ് ചെയ്തത്.
പുളിയറക്കോണത്ത് റോഡ് സൈഡിൽ തട്ടിട്ട് ലോട്ടറി കച്ചവടം നടത്തി വന്നിരുന്ന സുബ്രഹ്മണ്യന്റെ ലോട്ടറിയിലെ തട്ട് മറയ്ക്കുന്ന തരത്തിൽ കെഎസ്ആർടിസി ബസ് പാർക്ക് ചെയ്തതാണ് ഡ്രൈവറെ മർദ്ദിച്ചതിനുള്ള കാരണം. റോഡ് സൈഡിൽ പാർക്ക് ചെയ്തിരുന്ന കെഎസ്ആർടിസി ബസ് ഡ്രൈവറായ പേരൂർക്കട മണികണ്ഠേശ്വരം സ്വദേശി 47 വയസ്സുള്ള ജയമോഹനോട് പ്രതിയായ സുബ്രഹ്മണ്യൻ ചീത്ത വിളിച്ചുകൊണ്ട് വാഹനം മാറ്റുവാൻ ആവശ്യപ്പെടുകയായിരുന്നു.
തുടർന്ന് ബസ്സിൽ ചാടി കയറി കഴുത്തിൽ കുത്തി പിടിച്ച് മാരകമായി മർദ്ധിക്കുകയായിരുന്നു. സംഭവത്തിൽ പോലീസ് പുളിയറക്കോണത്ത് നിന്നും പ്രതിയെ അറസ്റ്റ് ചെയ്തു . പ്രതി പോലീസിനോട് കുറ്റസമ്മതം നടത്തി. കാട്ടാക്കട ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
