ന്യൂഡൽഹി: പ്രശസ്ത ഹോളിവുഡ് നടനും നിർമാതാവുമായ മൈക്കൽ ഡഗ്ലസിന് സത്യജിത് റായ് ലൈഫ് ടൈം അച്ചീവ്മെന്റ് അവാർഡ്. ഗോവയിൽ നടക്കുന്ന 54ാമത് ഇന്ത്യ അന്താരാഷ്ട്ര ചലച്ചിത്ര മേളയിൽ (ഐഎഫ്ഫ്ഐ 54) സമ്മാനിക്കും. കേന്ദ്ര വാർത്താവിതരണ പ്രക്ഷേപണ മന്ത്രി അനുരാഗ് സിങ് ഠാക്കൂർ സാമൂഹ്യമാധ്യമമായ എക്സിലൂടെയാണ് പുരസ്കാര പ്രഖ്യാപനം നടത്തിയത് .
മലയാളത്തിൽ പ്രിയദർശൻ – മോഹൻലാൽ കൂട്ടുകെട്ടിന്റെ ഏറെ ജനപ്രീതി നേടിയ “താളവട്ടം’ എന്ന ചിത്രം മൈക്കൽ ഡഗ്ലസ് നിർമിച്ച് 1975ൽ പുറത്തിറങ്ങിയ “വണ് ഫ്ലൂ ഓവര് കുക്കൂസ് നെസ്റ്റ് ‘ എന്ന പ്രശസ്ത ചിത്രത്തിന്റെ റീമെയ്ക്കായിരുന്നു. ഓസ്കർ ചരിത്രത്തിൽ മികച്ച ചിത്രം, സംവിധായകൻ, നടൻ, നടി, തിരക്കഥ എന്നീ പ്രധാന അഞ്ചു പുരസ്കാരങ്ങളും സ്വന്തമാക്കിയ അപൂർവം സിനിമകളിൽ ഒന്നായിരുന്നു “വണ് ഫ്ലൂ ഓവര് കുക്കൂസ് നെസ്റ്റ് ‘.
