കൊച്ചി: ഷവർമ്മ കഴിച്ച ശേഷം ഭക്ഷ്യവിഷബാധ സംശയത്തെ തുടർന്ന് ചികിത്സയിലായിരുന്ന യുവാവ് മരിച്ചു. കാക്കനാട് സെസിലെ ജീവനക്കാരനായ കോട്ടയം സ്വദേശി രാഹുൽ ആർ. നായരാണ് മരിച്ചത്. ഇന്ന് ഉച്ചയ്ക്ക് ശേഷമാണ് 24 കാരൻ മരണത്തിന് കീഴടങ്ങിയത്. കഴിഞ്ഞ 3 ദിവസമായി ആശുപത്രിയിൽ ഗുരുതരാവസ്ഥയിൽ വെന്റിലേറ്ററിൽ തുടരുകയായിരുന്നു.
ഷവർമ കഴിച്ചതിനു പിന്നാലെയാണ് ഇദ്ദേഹത്തിന് ആരോഗ്യസ്ഥിതി മോശമായതെന്നാണ് റിപ്പോർട്ട്. പാഴ്‌സലായിട്ടാണ് ഇയാൾ ഷവർമ വാങ്ങിയത്. കാക്കനാട്ടെ മാവേലിപുരത്തുള്ള ഹോട്ടലിൽ നിന്നാണ് യുവാവ് ഷവർമ വാങ്ങിയത്.
ഷവർമ കഴിച്ചതിന് ശേഷമാണ് ആരോഗ്യപ്രശ്‌നങ്ങൾ ഉണ്ടായതെന്നാണ് യുവാവ് ഡോക്ടർക്ക് നൽകിയ മൊഴി. എന്നാൽ രക്ത പരിശോധഫലമോ പോസ്റ്റുമോർട്ടം റിപ്പോർട്ടോ വന്നാൽ മാത്രമേ മരണ കാരണം വ്യക്തമാകു എന്നാണ് ഡോക്ടർമാർ പറയുന്നത്. യുവാവിന്റെ പരാതിയിൽ ഹോട്ടൽ അടച്ചുപൂട്ടിയിരുന്നു.
