കൊല്ലം: വീണ്ടും പ്രതിഷേധമറിയിച്ച് വാഹനത്തിൽ നിന്ന് ഇറങ്ങി ഗവർണർ ആരിഫ് മുഹമ്മദ് ഖാൻ. കൊല്ലം നിലമേലാണ് നാടകീയമായ സംഭവങ്ങൾ അരങ്ങേറിയത്. അമ്പതോളം വരുന്ന എസ് എഫ് ഐ പ്രവർത്തകർ നിലമേൽ വച്ച് ഗവർണറിനു നേരെ കരിങ്കൊടി കാണിച്ചു. ഇതിൽ ക്ഷുഭിതനായിട്ടാണ് ഗവർണർ തന്റെ ഔദ്യോഗിക വാഹനത്തിൽ നിന്ന് ഇറങ്ങി പ്രതിഷേധം അറിയിച്ചത്.
പ്രതിഷേധക്കാർ കരിങ്കൊടി കാണിച്ചതിനെ തുടർന്ന് കാറിൽ നിന്നിറങ്ങിയ ഗവർണർ ഇപ്പോഴും റോഡരികിൽ കസേര ഇട്ട് ഇരിക്കുകയാണ്. ഇതിനിടെയിൽ ഗവർണർ പൊലീസിനെയും ശകാരിച്ചു.എന്തുകൊണ്ട് ലാത്തിച്ചാർജ് നടത്തിയില്ലെന്നും, അക്രമികളെ പിടികൂടിയില്ലെന്നും അദ്ദേഹം പോലീസിനോട് ആരാഞ്ഞു. കൂടാതെ കരിങ്കൊടി കാണിച്ചവര്‍ക്കെതിരെ കേസെടുക്കാതെ വാഹനത്തില്‍ കയറില്ലെന്ന നിലപാടിലാണ് ഗവര്‍ണര്‍.
എന്നാൽ സംഭവത്തിൽ 12 പേരെ അറസ്റ്റ് ചെയ്തെന്ന് റൂറൽ എസ്.പി ഗവർണറെ അറിയിച്ചു. എന്നാൽ 50 പേരെയും അറസ്റ്റ് ചെയ്യാതെ മടങ്ങിപ്പോകില്ലെന്ന് ഗവർണർ പറഞ്ഞു.
