മലപ്പുറം: മലപ്പുറം കാളികാവ് ഉദരപൊയിലിലെ രണ്ടര വയസുകാരി നസ്റിന്റെമരണവുമായി ബന്ധപ്പെട്ട് പിതാവിനെ കസ്റ്റഡിയിലെടുത്ത് പോലീസ്. കുട്ടിയെ പിതാവ് മർദിച്ചു കൊലപ്പെടുത്തിയെന്ന ബന്ധുക്കളുടെ ആരോപണത്തിലാണ് പിതാവ് മുഹമ്മദ് ഫായിസിനെ പോലീസ് കസ്റ്റഡിയിലെടുത്തത്.
അസ്വഭാവിക മരണത്തിനാണു നിലവില് കേസെടുത്തിരിക്കുന്നത്. കുട്ടിയുടെ പോസ്റ്റുമോർട്ടം റിപ്പോർട്ട് വന്നാൽ മാത്രമേ കേസ് എടുക്കാൻ കഴിയൂവെന്ന് പോലീസ് അറിയിച്ചു. കുട്ടിയുടെ അമ്മ ഉൾപ്പെടുന്ന ബന്ധക്കളുടെ പരാതിയിലാണ് നടപടി. കാളികാവിലെ റബർ എസ്റ്റേറ്റിൽ നിന്നാണ് ഫായിസിനെ പിടികൂടിയത്.
ഞായറാഴ്ചയാണ് സംഭവം നടന്നത്. ഭക്ഷണം തൊണ്ടയിൽ കുടുങ്ങിയെന്ന് പറഞ്ഞായിരുന്നു കുഞ്ഞിനെ ആശുപത്രിയിൽ എത്തിച്ചത്. കുട്ടിയുടെ ശരീരത്തിൽ മർദനമേറ്റ പാടുകൾ ഉണ്ടായിരുന്നുവെന്നും ആരോപണമുണ്ട്. പിതാവ് ഫായിസാണ് കുഞ്ഞിനെ ആശുപത്രിയിൽ കൊണ്ടുവന്നത്. മരണത്തിൽ ദുരൂഹതയുള്ളതിനാൽ കുട്ടിയുടെ മൃതദേഹം പോസ്റ്റ് മോർട്ടത്തിനായി മഞ്ചേരി മെഡിക്കൽ കോളേജിലേക്ക് മാറ്റി.
