തിരുവനന്തപുരം: എറണാകുളത്ത് വച്ച് അപകടത്തിൽ പെട്ട സ്കാനിയ ബസ് ഡ്രൈവറെ അന്വേഷണവിധേയമായി സസ്പെൻഡ് ചെയ്തു. മെയ് 10 നാണ് അപകടം സംഭവിച്ചത്. സ്കാനിയ ബസ് ഓടിച്ചിരുന്ന തിരുവനന്തപുരം സെൻട്രൽ യൂണിറ്റിലെ ഡ്രൈവറെയാണ് സസ്പെൻഡ് ചെയ്തത്. കെഎസ്ആർടിസി വിജിലൻസ് വിഭാഗം നടത്തിയ പ്രാഥമിക അന്വേഷണത്തിലാണ് നടപടി.
ഈ മാസം 10 ന് കൊല്ലൂർ നിന്നും തിരുവനന്തപുരത്തേക്ക് വരികയായിരുന്നു സ്കാനിയ ബസ്. രാവിലെ ആറു മണിയോടെ എറണാകുളം ജില്ലയിയിലെ ചക്കരപ്പറമ്പിൽ വച്ച് കെഎസ്ആർടിസിയുടെ തന്നെ മറ്റൊരു ഓർഡിനറി ബസിൻ്റെ പുറകിലായി യാത്ര ചെയ്യുകയായിരുന്ന രണ്ടുപേർ സഞ്ചരിച്ചിരുന്ന ബൈക്കിൽ ഇടിച്ചാണ് അപകടം സംഭവിച്ചത്. അപകടത്തിൽ രണ്ട് ബൈക്ക് യാത്രികരും മരിച്ചിരുന്നു.
അപകടവുമായി ബന്ധപ്പെട്ട് കെഎസ്ആർടിസി വിജിലൻസ് വിഭാഗം നടത്തിയ പ്രാഥമിക അന്വേഷണത്തിലാണ് സ്കാനിയ ബസ് ഓടിച്ചിരുന്ന തിരുവനന്തപുരം സെൻട്രൽ യൂണിറ്റിലെ ഡ്രൈവർ കുറ്റക്കാരനാണെന്ന് കണ്ടെത്തിയത്.
