കഴക്കൂട്ടം: എൽ പി ജി പാചക വാതകവുമായി പോകവെ മംഗലപുരത്ത് മറിഞ്ഞ ടാങ്കർ ലോറിയിൽ നിന്ന് പാചകവാതകം മറ്റു വാഹനങ്ങളിലേക്ക് മാറ്റുന്ന ജോലി തുടരുന്നു. ലോറി രാത്രിയോടെ ക്രെയിൻ ഉപയോഗിച്ച് ഉയർത്താനാകുമെന്നാണ് പ്രതീക്ഷിക്കുന്നത്. ഞായറാഴ്ച വെളുപ്പിന് നാലു മണിക്ക് മംഗലപുരത്തിനടുത്ത് കുറക്കോട് പെട്രോൾപമ്പിന് സമീപത്തായിരുന്നു അപകടം നടന്നത്.
കൊച്ചിയിൽ നിന്നും തിരുനെൽവേലിയിലേക്ക് പാചകവാതകവുമായി പോകുകയായിരുന്ന ടാങ്കർ ലോറിയാണ് മറിഞ്ഞത്. ഡ്രൈവർ നാമക്കൽ സ്വദേശി എറ്റിക്കൺ (65)പരിക്കില്ലാതെ രക്ഷപെട്ടു. ദേശീയ പാതയുടെ നിർമ്മാണം നടക്കുന്നതിനാൽ വഴി തെറ്റി സർവീസ് റോഡിലേക്ക് വന്ന ടാങ്കർ ലോറി മഴയെ തുടർന്നു മണ്ണിൽ പുതഞ്ഞു മുന്നോട്ടോ പിറക്കേോട്ടോ പോകാൻ കഴിയാതെ താഴ്ന്നു മറിയുകയായിരുന്നു. തുടർന്ന് ഡ്രൈവർ എറ്റിക്കൺ വാതകചോർച്ചയില്ലാത്തതിനാൽ പൊലീസിൽ വിവരമറിയിച്ചില്ല. ലോറി ഉയർത്തുന്നതിനായി ക്രയിനിനുവേണ്ടി ബന്ധപ്പെട്ടിട്ടെങ്കിലും കിട്ടിയില്ല.
രാവിലെ ഏഴരയോടെ വഴിയാത്രക്കാർ വിവരമറിയിച്ചതിനെതുടർന്നാണ് മംഗലപുരം പൊലീസ് വിവരം അറിയുന്നത്. പൊലീസാണ് കഴക്കൂട്ടം ഫയർ ഫോർസിനെ അറിയിച്ചത്. തുടർന്ന് സമീപ പ്രദേശത്തെ വൈദ്യുതി വിച്ഛേദിച്ചിക്കുകയും ഗതാഗത നിയന്ത്രണം ഏർപ്പെടുത്തുകയും സമീപത്തെ അരകിലോമീറ്റർ ചുറ്റളവിലുള്ളവർക്ക് സുരക്ഷ മുന്നറിയിപ്പ് നൽകുകയും ചെയ്തു. ഇതിനു ശേഷം ഇന്ത്യൻ ഓയിൽ കോർപ്പറേഷൻ പാരിപ്പള്ളി പ്ലാന്റിൽ നിന്നും നിന്നെത്തിയ സംഘമാണ് വാതകം മാറ്റുന്ന ജോലികൾ നടത്തി വരുന്നത്.
