മലപ്പുറം: സ്വകാര്യ ആശുപത്രിയിൽ ചികിത്സയിലിരിക്കെ നാലു വയസുകാരൻ മരിച്ച സംഭവത്തിൽ കൊണ്ടോട്ടി പൊലീസ് കേസെടുത്തു. ഇന്നലെയാണ് സംഭവം നടന്നത്. ബന്ധുക്കളുടെ പരാതിയിലാണ് കേസെടുത്തിരിക്കുന്നത്.
കൊണ്ടോട്ടി മേഴ്സി ആശുപത്രിയ്ക്കെതിരെയാണ് ചികിത്സ പിഴവ് എന്ന ആരോപണം ഉയർന്നിരിക്കുന്നത്. അരിമ്പ്ര സ്വദേശി നിസാറിന്റെ മകൻ മുഹമ്മദ് ഷാനിലാണ് ഇന്നലെ ആശുപത്രിയിൽ വച്ച് മരിച്ചത്. അനസ്തീഷ്യ കൊടുത്തതിലെ പിഴവാണ് മരണ കാരണമെന്ന് ബന്ധുക്കള് ആരോപിക്കുന്നു.
ഇന്നലെയാണ് നാലുവയസുകാരനായ മുഹമ്മദ് ഷാനിലിനെ കൊണ്ടോട്ടി മേഴ്സി ആശുപത്രിയില് പ്രവേശിപ്പിച്ചത്. കളിക്കുന്നതിനിടെ വായില് കമ്പു കൊണ്ട് മുറിഞ്ഞതിനെത്തുടര്ന്നാണ് ആശുപത്രിയിൽ പ്രവേശിപ്പിച്ചത്. തുടർന്ന് മുറിവിനു തുന്നലിടാനായി അനസ്തേഷ്യ നല്കണമെന്ന ഡോക്ടര്മാരുടെ നിര്ദേശത്തെ തുടർന്ന് കുട്ടിക്ക് അനസ്തേഷ്യ നൽകിയിരുന്നു. എന്നാൽ അനസ്തേഷ്യ നൽകിയതിന് പിന്നാലെ കുഞ്ഞ് മരിക്കുകയായിരുന്നു.
