പാലക്കാട്: യാത്രക്കാർക്ക് ഇരുട്ടടി സമ്മാനിച്ച് വടക്കഞ്ചേരി പന്നിയങ്കര ടോള് പ്ലാസ. ഇന്ന് അര്ധരാത്രി മുതല് ഇവിടെ ടോള് നിരക്കു വര്ധിപ്പിക്കും. ഏപ്രില് 1 മുതല് ടോള് നിരക്കു വര്ധിപ്പിച്ചിരുന്നു. എന്നാൽ തിരഞ്ഞടുപ്പു കാലത്തു വര്ധന വേണ്ടെന്നു ദേശീയപാത അതോറിറ്റി ഉത്തരവിടുകയായിരുന്നു. തുടർന്നാണ് ഇപ്പോൾ നിരക്ക് വർദ്ധനവ് പ്രാബല്യത്തിൽ വരുത്തുന്നത്.
കാര്, ജീപ്പ്, ചെറിയ വാഹനങ്ങള് എന്നിവയ്ക്ക് ഒരു വശത്തേയ്ക്ക് 110 രൂപയാണ് പുതിയ നിരക്ക്. മടക്കയാത്രയും കൂടി ചേരുമ്പോള് ഇത് 165 രൂപയാകും. നേരത്തെ 160 രൂപയായിരുന്നു. അതെ സമയം സ്കൂൾ വാഹനങ്ങൾക്കും ടോൾ നൽകണം. പുതിയ നിരക്ക് പ്രകാരം മിനി ബസ്, ചെറിയ വാണിജ്യവാഹനങ്ങള് എന്നിവയ്ക്ക് 170 രൂപയാണ് (വണ്സൈഡ്) ഈടാക്കുക. ബസ്, ട്രക്ക് ( രണ്ട് ആക്സില്) എന്നിവയ്ക്ക് ഒരു വശത്തേയ്ക്ക് 350 രൂപയാണ് പുതുക്കിയ നിരക്ക്. വലിയ വാഹനങ്ങള്ക്ക് ( 3-6 ആക്സില്) ഒരു വശത്തേയ്ക്ക് 530 രൂപയാണ് പുതിയ നിരക്ക്.
