ഡൽഹി: മൂന്നാം മോദി സർക്കാരിന്റെ സത്യപ്രതിജ്ഞാ ചടങ്ങിലേക്ക് നടൻ മോഹൻലാലിന് നരേന്ദ്ര മോദിയുടെ നേരിട്ടുള്ള ക്ഷണം. നരേന്ദ്ര മോദി നേരിട്ട് മോഹൻലാലിനെ ചടങ്ങിൽ പങ്കെടുക്കുന്നതിനായി ക്ഷണിച്ചുവെന്നാണ് റിപ്പോർട്ടുകൾ. എന്നാൽ പങ്കെടുക്കാൻ കഴിയില്ലെന്ന് മോഹൻലാൽ നരേന്ദ്ര മോദിയെ അറിയിച്ചു. വ്യക്തിപരമായ അസൗകര്യം കാരണമാണ് പങ്കെടുക്കാത്തതെന്ന് അദ്ദേഹം അറിയിച്ചു.
അതെ സമയം കേരളാ മുഖ്യമന്ത്രി പിണറായി വിജയനും ക്ഷണമുണ്ട്. മുഖ്യമന്ത്രിക്ക് ക്ഷണക്കത്ത് എത്തിയത് കേരള ഹൗസിലാണ്. ഇവരെ കൂടാതെ ഗവര്ണര് ആരിഫ് മുഹമ്മദ് ഖാനും സംസ്ഥാനത്തെ 115 ബിജെപി നേതാക്കൾക്കും ക്ഷണമുണ്ട്. കോൺഗ്രസിനും സംസ്ഥാനത്ത് നിന്നുള്ള എംപിമാരെയും ചടങ്ങിലേക്ക് ക്ഷണിച്ചിട്ടുണ്ട്.
സിനിമ താരങ്ങൾ അടക്കം ചടങ്ങിൽ പങ്കെടുക്കും. വൈകിട്ട് 7.15ന് തുടങ്ങുന്ന മൂന്നാം മോദി സർക്കാരിന്റെ സത്യപ്രതിജ്ഞയ്ക്കുള്ള ഒരുക്കം അന്തിമ ഘട്ടത്തിലാണ്. ചടങ്ങിൽ പങ്കെടുക്കാനായി ബംഗ്ളാദേശ് പ്രധാനമന്ത്രി ഷെയ്ക് ഹസീന, സീഷൽസ് ഉപരാഷ്ട്രപതി അഹമദ് ആഫിഫ് എന്നിവർ ഡൽഹിയിൽ എത്തിച്ചേർന്നിട്ടുണ്ട്.
