കഴക്കൂട്ടം: കഴക്കൂട്ടത്ത് ശക്തമായ മഴയിലും കാറ്റിലും കൂറ്റൻ പരസ്യ ബോർഡ് തകർന്നു വീണു. കഴക്കൂട്ടം മഹാദേവർ ക്ഷേത്രത്തിലെ പടിഞ്ഞാറേ നട റോഡിലെ കൂറ്റൻ പരസ്യ ബോർഡാണ് തകർന്നു വീണത്. ആളപായം ഒന്നും റിപ്പോർട്ട്‌ ചെയ്തിട്ടില്ല. ഇന്ന് ഉച്ചതിരിഞ്ഞ് 4 മണിയോടെയാണ് സംഭവം നടന്നത്.
സ്വകാര്യ വ്യക്തിയുടെ കെട്ടിടത്തിൻ്റെ മുകളിൽ സ്ഥാപിച്ചിരുന്ന പരസ്യ ബോർഡാണ് കെ എസ് ഇ ബി യുടെ പോസ്റ്റും കേബിളും തകർത്തു കൊണ്ട് റോഡിലേയ്ക്കു പതിച്ചത്. ബോർഡ് സമീപത്തെ മതിലിൽ തട്ടി നിന്നതിനാൽ അപകടം ഒഴിവായി. നിരവധി വ്യാപര സ്ഥാപനങ്ങൾ പ്രവർത്തിക്കുന്ന കെട്ടിടത്തിൻ്റെ മുകളിൽ കാര്യമായ സുരക്ഷ ഒരുക്കാതെ സ്ഥാപിച്ച ബോർഡാണ് കാറ്റിൽ കാലുകൾ ഉറപ്പിച്ചിരുന്ന കോൺക്രീറ്റ് അടിത്തറയോടെ നിലം പൊത്തിയത്.
