തിരുവനന്തപുരം: കഴിഞ്ഞദിവസം നടന്ന തുമ്പ ബോംബേറു കേസിൽ പ്രധാന പ്രതികളിൽ ഒരാൾ പൊലീസ് പിടിയിൽ. മേനംകുളം സ്വദേശി ഷെബിൻ ബാബുവിനെയാണ് (28) പൊലീസ് പിടികൂടിയത്.
17 കേസുകളാണ് ഷെബിനെതിരെ തുമ്പ, കഴക്കൂട്ടം സ്റ്റേഷനുകളിൽ ഉള്ളത്. ഗുണ്ടാ ആക്രമണം, പടക്കമേറ്, അടി പിടി, ഭവന ഭേദനം തുടങ്ങിയ കേസുകളാണ് ഇയാൾക്കെതിരെ രജിസ്റ്റർ ചെയ്തിട്ടുള്ളത്. മാത്രമല്ല നിരവധി കേസുകളിലെ പ്രതിയായ തുമ്പ സ്വദേശി സുനിൽ കുമാറിൻ്റെ സഹായിയാണ് ഷെബിൻ ബാബു.
ഇന്നലെ ഉച്ചയ്ക്കാണ് കേസിനാസ്പദമായ സംഭവം നടന്നത്. നെഹ്റു ജംഗ്ഷനു സമീപം ഇടറോഡിൽ വച്ചാണ് നെഹ്റു ജംഗ്ഷൻ സ്വദേശികളായ അഖിൽ (23), വിവേക് (27) എന്നിവർക്കു നേരെ രണ്ടു നാടൻ ബോംബുകൾ എറിഞ്ഞത്. ഗുണ്ടാ നേതാവ് സുനിലിൻ്റെ നേതൃത്വത്തിലാണ് രണ്ടു സ്കൂട്ടറുകളിലായി എത്തിയ നാലംഗ സംഘം ആക്രമണം നടത്തിയത്. പരിക്കേറ്റ രണ്ടു പേരും നിരവധി ക്രിമിനൽ കേസുകളിലെ പ്രതികളാണ്. ഇതിൽ അഖിൽ കാപ്പ നിയമപ്രകാരം ശിക്ഷ കഴിഞ്ഞ് ഇറങ്ങിയ ആളാണ്.
