കഴക്കൂട്ടം: തിരുവനന്തപുരത്ത് കഠിനംകുളത്ത് മത്സ്യബന്ധന വള്ളം മറിഞ്ഞു. മര്യനാടാണ് സംഭവം. അപകടത്തിൽ ഒരു മത്സ്യത്തൊഴിലാളി മരിച്ചു. മൂന്നുപേർക്ക് പരിക്കേറ്റു. മര്യനാട് ആർത്തിയിൽ പുരയിടത്തിൽ സേവിയർ (62)ആണ് മരിച്ചത്.
ഇന്നലെ വൈകുന്നേരം അഞ്ചരയോടെയാണ് സംഭവം. മത്സ്യബന്ധനം കഴിഞ്ഞ് വരുമ്പോഴാണ് അപകടം സംഭവിച്ചത്. ശക്തമായ തിരയടിയിൽ വെള്ളം തലകീഴായി മറിയുകയായിരുന്നു. മരിച്ച സേവ്യറിൻ്റെ മകൻ അനീഷിൻ്റെ ഉടമസ്ഥതയിലുള്ള ആവേ മരിയ എന്ന വള്ളമാണ് അപകടത്തിൽപ്പെട്ടത്.
കരയിൽ ഉണ്ടായിരുന്നവരും സമീപത്തെ വള്ളങ്ങളിൽ ഉണ്ടായിരുന്നവരും ചേർന്നാണ് ഇവരെ രക്ഷപ്പെടുത്തിയത്. വള്ളത്തിനടിയിപ്പെട്ടു സേവ്യർക്ക് ഗുരുതരമായി പരിക്കേൽക്കുകയായിരുന്നു. ഉടൻ തന്നെ സേവ്യറെ കഴക്കൂട്ടത്തെ സ്വകാര്യ ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല.
ജോൺസൺ, അനീഷ് വിനോദ് എന്നിവർക്കാണ് പരിക്കേറ്റത്. പരിക്കേറ്റവരെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്. ഇതിൽ ജോൺസൻ്റെ പരിക്ക് ഗുരുതരമാണ്. അന്തോണി അമ്മയാണ് മരിച്ച സേവ്യറിൻ്റെ ഭാര്യ. അനീഷ്, ബിനു, കിരൺ, അരുൺ എന്നിവർ മക്കളാണ്.
