തിരുവനന്തപുരം: ഉമ്മൻചാണ്ടിയുടെ ഒന്നാം ചരമവാർഷികത്തിന്റെ ഭാഗമായി യുഡിഎഫ് കഴക്കുട്ടം നിയോജകമണ്ഡലം കമ്മിറ്റിയുടെ ഭാഗമായി സെമിനാർ സംഘടിപ്പിക്കുന്നു. ഉമ്മൻ ചാണ്ടി വഴി വിഴിഞ്ഞം, വികസനം, ദീർഘവീക്ഷണം, ദൃഢനിശ്ചയം എന്ന വിഷയത്തിലാണ് സെമിനാർ.
കഴക്കൂട്ടം സർവ്വീസ് സഹകരണ ബാങ്ക് ഹാളിൽ വച്ച് നാളെ വൈകുന്നേരം 3:30യ്ക്കാണ് സെമിനാർ നടക്കുക. കെപിസിസി വർക്കിംഗ് പ്രസിഡൻറ് ടി സിദ്ധീഖ് എംഎൽഎ സെമിനാർ ഉദ്ഘാടനം ചെയ്യും. മുൻ ജൈവവൈവിധ്യ ബോർഡ് ചെയർമാൻ, സി എസ് ഐ ആർ ശാസ്ത്രജ്ഞൻ ഡോ ഉമ്മൻ വി ഉമ്മൻ വിഷയാവതരണം നടത്തും.
യുഡിഎഫ് ചെയർമാൻ ആർ പുരുഷോത്തമൻ അധ്യക്ഷത വഹിക്കുന്ന സെമിനാറിൽ കെ പി സി സി സെക്രട്ടറി ജോൺ വിനേഷ്യസ്, ഡിസിസി ജനറൽ സെക്രട്ടറി എം എസ് അനിൽ, മുതിർന്ന മാധ്യമപ്രവർത്തകൻ ജോൺ മുണ്ടക്കയം, വിഴിഞ്ഞം പോർട്ട് മുൻ എംഡി & സി ഇ ഒ എ എസ് സുരേഷ് ബാബു, മുൻ എം എൽ എ അഡ്വ. എം എ വാഹിദ്, ആർഎസ്പി ദേശീയ സമിതി അംഗം കെ എസ് സനൽകുമാർ, ഗവേഷക വിദ്യാർഥി ആദർശ് എച്ച് എസ്, കോൺഗ്രസ് ബ്ലോക്ക് പ്രസിഡന്റ് അണിയൂർ പ്രസന്നകുമാർ തുടങ്ങിയവർ പങ്കെടുക്കും.
