കൊല്ലം: കൊല്ലത്ത് ഗർഭിണിയായ കുതിരയെ ക്രൂരമായി ആക്രമിച്ച് പരിക്കേൽപ്പിച്ചതായി പരാതി. പള്ളിമുക്കിലാണ് സംഭവം നടന്നത്. കാറിലെത്തിയ അഞ്ച് യുവാക്കളാണ് കുതിരയെ അതിക്രൂരമായി മർദിച്ചത്. സംഭവത്തിന്റെ സിസിടിവി ദൃശ്യങ്ങള് പുറത്തു വന്നു.
കഴിഞ്ഞ വ്യാഴായ്ച്ചയാണ് കേസിനാസ്പദമായ സംഭവം നടന്നത്. കുതിരയുടെ ഉടമ ഷാനവാസിന്റെ പരാതിയിൽ പോലീസ് കേസ് രജിസ്റ്റർ ചെയ്തു. കത്തിയും വടിയും കൊണ്ടായിരുന്നു സംഘം കുതിര ആക്രമിച്ചത്. അയത്തില് തെക്കേക്കാവ് ഭഗവതിക്ഷേത്രപരിസരത്താണ് പകല് കുതിരയെ കെട്ടിയിരുന്നത്. വൈകുന്നേരം കുതിരയെ അഴിക്കാൻ എത്തിയപ്പോഴാണ് മുറിവുകൾ കുതിരയുടെ ഉടമയുടെ ശ്രദ്ധയിൽപ്പെട്ടത്.
തുടർന്ന് ക്ഷേത്രത്തിലെ സി സി ടി വി ദൃശ്യങ്ങൾ പരിശോധിച്ചപ്പോഴാണ് മർദന വിവരം പുറത്തറിഞ്ഞത്. കുതിരയ്ക്ക് ഗുരുതരമായി പരിക്കേറ്റിരുന്നു. പരുക്കേറ്റ കുതിരയ്ക്ക് ജില്ലാ വെറ്ററിനറി ഉദ്യോഗസ്ഥർ ചികിത്സ നൽകി.
