ആലപ്പുഴ: നവവധുവിനെ ഭർതൃഗൃഹത്തിൽ മരിച്ച നിലയിൽ കണ്ടെത്തി. ആലപ്പുഴ നഗരസഭ പരിധിയാണ് സംഭവം. മുനീറിന്റെ ഭാര്യ കായംകുളം സ്വദേശി ആസിയ (22) ആണ് മരിച്ചത്. ഡെന്റല് ടെക്നീഷ്യനായി ജോലി ചെയ്ത് വരികയായിരുന്നു ആസിയ.
നാല് മാസം മുൻപാണ് ആസിയയുടെയും മുനീറിന്റെ വിവാഹം കഴിഞ്ഞത്. ഇന്നലെ രാത്രി ഭർത്താവും വീട്ടുകാരും പുറത്തുപോയി മടങ്ങിവന്നപ്പോഴാണ് ആസിയയെ മരിച്ച നിലയിൽ കണ്ടെത്തിയത്. തൂങ്ങി മരിച്ച നിലയിലായിരുന്നു ആസിയയെ കണ്ടെത്തിയത്.
ഭർത്താവ് മുനീർ (30) ഒരു സ്വകാര്യ ബാങ്കിലെ ഗോൾഡ് ലോൺ സെക്ഷനിൽ ജോലി ചെയ്യുന്നു. ജോലിയുടെ ഭാഗമായി ആസിയ ആഴ്ച്ചയില് ഒരു ദിവസമാണ് ഭര്തൃവീട്ടില് വരുന്നത്. മൂവാറ്റുപുഴയില് താമസിച്ച് ജോലി ചെയ്തുവരുകയായിരുന്നു. സംഭവത്തിൽ പൊലീസ് അസ്വാഭാവിക മരണത്തിന് കേസെടുത്തു. ആസിയ മരിക്കുന്നതിന് മുൻപ് ഫെയ്സ്ബുക്കിൽ പങ്കുവച്ച കുറിപ്പിൽ ആത്മഹത്യയുടെ സൂചനകളുണ്ടെന്നാണ് പുറത്തുവരുന്ന വിവരം.
പിതാവിന്റെ മരണത്തിൽ ദുഃഖിതയാണെന്നും പിതാവിനൊപ്പം പോകുന്നുവെന്നുമാണ് ആസിയ ഫേസ്ബുക്കിൽ പങ്കുവച്ചത്. ഇത് സംബന്ധിച്ച് പൊലീസ് അന്വേഷണം തുടങ്ങി. ആസിയയുടെ വിവാഹത്തിന് ഒരു മാസം മുൻപാണ് പിതാവ് മരിക്കുന്നത്.
