കൊല്ലം: നവജാത ശിശുവിന്റെ മാതാവിനെ ക്രൂരമായി മർദിച്ച് ഭർതൃവീട്ടുകാർ. കുഞ്ഞിന് പാൽ നല്കിയില്ലെന്ന് ആരോപിച്ചാണ് മർദനം. കൊല്ലം നീണ്ടകര നീലേശ്വരം തോപ്പ് സ്വദേശി 19 കാരിയായ അലീനയ്ക്കാണ് പ്രസവം കഴിഞ്ഞ് ഇരുപത്തിയേഴാം ദിവസം ക്രൂരമായ പീഡനം ഏൽക്കേണ്ടി വന്നത്.
ഭർത്താവും, ഭർത്താവിൻ്റെ സഹോദരനും, ഭർതൃപിതാവും, ഭർതൃമാതാവും ചേർന്നാണ് മർദിച്ചത്. യുവതിയുടെ കയ്യും കാലും കെട്ടിയിട്ട് മര്ദ്ദിച്ചുവെന്നാണ് പരാതിയില് പറയുന്നത്. മർദനത്തിൽ യുവതിയ്ക്ക് ശരീരമാസകലം മുറിവേറ്റിട്ടുണ്ട്.
കുഞ്ഞിന് പാൽ കൊടുത്ത ശേഷം കുഞ്ഞിനെ ഉറക്കി കിടത്തിയതായിരുന്നു യുവതി. ആ സമയത്താണ് ഭർത്താവും മറ്റുള്ളവരും മുറിയിലേക്ക് വന്നത്. തുടർന്ന് ഇവർ യുവതിയോട് കുട്ടിക്ക് പാൽ കൊടുക്കാൻ ആവശ്യപ്പെടുകയായിരുന്നു. എന്നാൽ കുഞ്ഞിന് പാൽ കൊടുത്തിട്ട് രണ്ടു മണിക്കൂർ പോലും ആയില്ലെന്നും യുവതി ഇവരോട് പറഞ്ഞു.
തുടർന്നായിരുന്നു എല്ലാവരും കൂടെ ചേർന്ന് യുവതിയെ ക്രൂരമായി മർദിച്ചത്. ശ്വാസം പോലും കിട്ടിയില്ലെന്നും അവർ മർദിച്ച് അവശയാക്കിയെന്നും യുവതി പറയുന്നു.
