തിരുവനന്തപുരം: തിരുവോണനാളിൽ തലസ്ഥാന ജില്ലയിൽ വിവിധ സ്ഥലങ്ങളിൽ നടന്ന വാഹനാപകടത്തിൽ അഞ്ചു പേർ മരിച്ചു. വര്‍ക്കലയിലും കഴക്കൂട്ടത്തും മംഗലപുരത്തുമാണ് അപകടങ്ങൾ നടന്നത്. വർക്കലയിൽ ബൈക്കുകൾ കൂട്ടിയിടിച്ച് മൂന്ന് യുവാക്കൾ മരിച്ചു. നിയന്ത്രണം വിട്ട വാഹനങ്ങള്‍ കൂട്ടിയിടിച്ചാണ് അപകടം സംഭവിച്ചത്.
വര്‍ക്കല കുരയ്ക്കണ്ണി ജംഗ്ഷനിലാണ് അപകടം നടന്നത്. ഇന്നലെ രാത്രി പതിനൊന്നേകാലോടെയായിരുന്നു അപകടമുണ്ടായത്. ഒരു ബൈക്കിൽ 3 പേരും ഒരു ബൈക്കിൽ രണ്ടു പേരുമാണ് സഞ്ചരിച്ചിരുന്നത്. അപകടത്തിൽ മൂന്ന് യുവാക്കൾ സംഭവസ്ഥലത്തു വച്ച് തന്നെ മരിച്ചിരുന്നു. ഇടവ തോട്ടുമുഖം സ്വദേശികളായ ആനന്ദബോസ് (19), ആദിത്യന്‍(19), വര്‍ക്കല പുന്നമൂട് സ്വദേശി ജിഷ്ണു (20)എന്നിവരാണ് മരിച്ചത്. ബാക്കി രണ്ടു പേർക്ക് പരിക്കേറ്റു. ഇവരെ തിരുവനന്തപുരം മെഡിക്കൽ കോളേജിൽ പ്രവേശിപ്പിച്ചിരിക്കുകയാണ്.
മംഗലപുരം ശാസ്തവട്ടത്ത് ഓണാഘോഷത്തിനിടയിലേക്ക് ബൈക്ക് പാഞ്ഞുകയറിയാണ് ഒരാള്‍ മരിച്ചത്. ശാസ്തവട്ടം സ്വദേശി ഷൈജുവാണ് മരിച്ചത്. കഴക്കൂട്ടത്ത് വാഹനത്തിന്റെ നിയന്ത്രണം നഷ്ടപ്പെട്ടാണ് അപകടം സംഭവിച്ചത്. നിയന്ത്രണം നഷ്ടപ്പെട്ട ബൈക്ക് മരത്തിൽ ഇടിച്ചാണ് അപകടം സംഭവിച്ചത്.
