തിരുവനന്തപുരം: തിരുവനന്തപുരത്ത് എടിഎം കൗണ്ടർ പൊളിച്ച് കവർച്ച നടത്താൻ ശ്രമിച്ച പ്രതി പോലീസ് പിടിയിൽ. ബീഹാർ സ്വദേശി മുഹമ്മദ് തൻവീർ (29) നെയാണ് പൊലീസ് അറസ്റ്റു ചെയ്തത്. തിരുവനന്തപുരം വട്ടിയൂർക്കാവ് ജംഗ്ഷന് സമീപമുള്ള എ ടി എമ്മിലാണ് ഇയാൾ കവർച്ച നടത്തിയത്.
ഈ മാസം 21 നാണ് കേസിനാസ്പദമായ സംഭവം നടന്നത്. കാനറ ബാങ്കിൻ്റെ എ ടി എം കൗണ്ടറിലാണ് മോഷണ ശ്രമം നടന്നത്. കേസിലെ മുഖ്യ പ്രതിയായ മുഹമ്മദ് തൻവീർ വട്ടിയൂർക്കാവിന് സമീപമുള്ള ഹോട്ടലിലെ ജീവനക്കാരനാണ്.ശനിയാഴ്ച്ച രാത്രി 12 മണിയോടെയാണ് സംഭവം.
ഇയാൾ എ ടി എം കൗണ്ടറിനുള്ളിൽ പ്രവേശിച്ച് ശേഷം മെഷീൻ്റെ മുൻവശത്തെ താഴ്ഭാഗത്തുള്ള പാനൽ ഡോർ പൂട്ട് പൊട്ടിച്ച് തുറന്നു. എന്നിട്ട് ബാറ്ററി പാനൽ ഇളക്കി മാറ്റാൻ ശ്രമിച്ചു. പക്ഷെ അപ്പോഴേക്കും സെക്യൂരിറ്റി കൺട്രോളിൽ അലാറം മുഴങ്ങി. ഇതോടെ ഇയാൾ ശ്രമം ഉപേക്ഷിച്ച് രക്ഷപ്പെടുകയായിരുന്നു. തുടർന്ന് വട്ടിയൂർക്കാവ് പോലീസ് നടത്തിയ പരിശോധനയിലാണ് പ്രതിയെ പിടികൂടിയത്.
