തിരുവനന്തപുരം: തിരുവനന്തപുരം കഠിനംകുളത്ത് പൊള്ളലേറ്റ് ചികിത്സയിലായിരുന്ന 50 വയസുകാരൻ മരിച്ചു. കഠിനംകുളം വെട്ടുതുറ കനോഷ്യൻ കോൺവെന്റിന് എതിർവശം പ്രീതി ലാൻഡിൽ താമസിക്കുന്ന ജിജോ ക്ലീറ്റസ്(50) ആണ് മരിച്ചത്.
ഇന്നലെ വൈകുന്നേരം അഞ്ചരയ്ക്കാണ് അപകടം നടന്നത്. വീടിനോട് ചേർന്നുള്ള ഷീറ്റ് ഇട്ട് അടുക്കളയിൽ ചായ ഉണ്ടാക്കാൻ കയറിയതായിരുന്നു ജിജോ. അടുപ്പിൽ തീ പകരുന്നതിനിടെ ജിജോയുടെ ദേഹത്ത് തീ പടർന്നു പിടിക്കുകയായിരുന്നു. അടുക്കളയിൽ ഗ്യാസ് ലീക്കായതാണ് അപകട കാരണമെന്നാണ് വിവരം.
ജിയോയ്ക്ക് 70 ശതമാനത്തിലധികമാണ് പൊള്ളലേറ്റത്. അപകടം നടന്ന ഉടൻ തന്നെ ഭാര്യ അനിതയും മകൾ ആഷിയും ചേർന്ന് ജോയോയെ മെഡിക്കൽ കോളേജ് ആശുപത്രിയിൽ എത്തിച്ചിരുന്നു. ബേൺ ഐ സി യുവിൽ ചികിത്സയിൽ കഴിയവേ ഇന്ന് മരണത്തിനു കീഴടങ്ങുകയായിരുന്നു.
