മുംബൈ: 2006ലെ മുംബൈ ട്രെയിന് സ്ഫോടനക്കേസിലെ 12 പ്രതികളുടെ ശിക്ഷാവിധി റദ്ദാക്കി ബോംബെ ഹൈക്കോടതി. വിചാരണ കോടതി വധശിക്ഷയടക്കം വിധിച്ച പ്രതികളാണ് കുറ്റവിമുക്തരായത്. 2015ൽ വിചാരണ കോടതി ഈ 12 പ്രതികളെ കുറ്റക്കാരായി കണ്ടെത്തിയിരുന്നു.
അഞ്ച് പേർക്ക് വധശിക്ഷയും മറ്റുള്ളവർക്ക് ജീവപര്യന്തം തടവുമാണ് ഇവർക്ക് വിധിച്ചിരുന്നത്. കേസ് തെളിയിക്കുന്നതില് മഹാരാഷ്ട്ര പൊലീസ് പരാജയപ്പെട്ടുവെന്ന് നിരീക്ഷിച്ചാണ് ഹൈക്കോടതി ഇപ്പോൾ പ്രതികളെ വെറുതെവിട്ടത്.
189 പേരുടെ ജീവനെടുക്കുകയും 800ലേറെ പേര്ക്ക് പരുക്കേല്ക്കുകയും ചെയ്ത സ്ഫോടന പരമ്പരയാണ് മുംബൈ ട്രെയിന് സ്ഫോടനക്കേസ്. 2006 ജൂലൈ 11ന് വൈകീട്ട് ആറരയോടെയാണ് സബര്ബന് ട്രെയിനുകളില് സ്ഫോടന പരമ്പര നടന്നത്. സ്ഫോടനക്കേസില് 19 വര്ഷമായി ജയിലില് കഴിയുന്ന 12 പ്രതികളെയും ജയിലില് നിന്ന് വിട്ടയയ്ക്കണമെന്നും ഹൈക്കോടതിയുടെ നിര്ദ്ദേശം.
ജസ്റ്റിസ് അനിൽ കിലോർ, ജസ്റ്റിസ് ശ്യാം ചന്ദക് എന്നിവരടങ്ങിയ ഹൈക്കോടതി ബെഞ്ചാണ് ശിക്ഷാ വിധി റദ്ദാക്കിയത്. പ്രോസിക്യൂഷൻ ഹാജരാക്കിയ തെളിവുകള് വിശ്വസനീയമല്ലെന്നും പ്രതികള് കുറ്റം ചെയ്തുവെന്ന് വിശ്വസിക്കാനാവുന്നില്ലെന്നും നിരീക്ഷിച്ചാണ് ബോംബെ ഹൈക്കോടതിയുടെ നടപടി.
