തിരുവനന്തപുരം: തിരുവനന്തപുരത്ത് ബൈക്ക് അപകടത്തിൽ പരിക്കേറ്റ് ചികിത്സയിലായിരുന്ന സ്വകാര്യ റിസോർട്ട് മാനേജർ മരിച്ചു. തിരുവനന്തപുരം വിഴിഞ്ഞം കോട്ടുകാല് പുന്നവിള റോഡരികത്ത് മരിയൻ വില്ലയിൽ എ ജോസ് (60) ആണ് മരിച്ചത്.
കഴിഞ്ഞ മാസം 27നായിരുന്നു അപകടം നടന്നത്. ഉച്ചയ്ക്ക് ബൈക്കിൽ വീട്ടിലേക്കു വരുമ്പോൾ തെരുവുനായ വാഹനത്തിനു കുറുകെ ചാടുകയായിരുന്നു. പുന്നവിള ഭാഗത്തു വച്ചാണ് അപകടം നടന്നത്. അപകടത്തിൽ ജോസിന് ഗുരുതരമായി പരിക്കേറ്റിരുന്നു.
തലയ്ക്ക് ഗുരുതര പരുക്കേറ്റു സ്വകാര്യ ആശുപത്രിയിൽ ചികിത്സയിലിരിക്കെ ഇന്നലെ പുലർച്ചെയാണ് മരിച്ചത്. ഭാര്യ: മരിയ. മക്കൾ: റിനി, റിതു.
